Governu lansa planu estratéjiku “Timor Dijitál 2032” atu impulsiona dezenvolvimentu dijitál no teknolójiku nasionál
Ministru Prezidénsia Konsellu Ministrus, Fidelis Manuel Leite Magalhães, reprezenta Primeiru-Ministru, Taur Matan Ruak, hamutuk ho Diretór Ezekutivu Ajénsia Teknolojia Informasaun no Komunikasaun (TIK Timor IP), Roberto Caetano de Sousa Vicente, iha loron 2 fulan-juñu tinan 2023, lansa ona Planu Estratéjiku Nasionál ba Dezenvolvimentu Dijitál no Teknolojia Informasaun no Komunikasaun (“Timor Dijitál 2032”) nian atu impulsiona dezenvolvimentu dijitál no teknolójiku iha país ne’e.
Serimónia ne’e hala’o iha Ministériu Negósius Estranjeirus no Kooperasaun no konta ho partisipasaun husi membru Governu, reprezentante hosi korpu diplomátiku, parseiru dezenvolvimentu no organizasaun sira husi sosiedade sivíl.
“Timor Dijitál 2032” hanesan planu estratéjiku ida ba tinan sanulu nian atu dezenvolve teknolojia dijitál no teknolojia sira TIK nian, ho énfaze iha ninia aplikasaun iha área krítika sira no ho impaktu ne’ebé boot tebes iha dezenvolvimentu umanu no ekonómiku, hanesan prestasaun servisu sira governamentál – governu eletróniku/dijitál, ekonomia inkluziva, saúde, edukasaun no agrikultura. Atu mantén tuir prioridade dezenvolvimentu sira Governu nian, prepara ona mós planu estratéjiku ne’e atu bele hetan adaptasaun no bele inklui área adisionál sira ho neineik.
Planu estratéjiku ida-ne’e hanesan rezultadu husi Programa Reforma Administrasaun Públika Governu Konstitusionál VIII nian, ne’ebé ho durasaun ba tinan sanulu no ho objetivu atu aplika teknolojia dijitál no teknolojia nian sira TIK (Teknolojia Informasaun no Komunikasaun) nian iha área prioritária sira ba dezenvolvimentu umanu no ekonómiku.
Entre objetivu sira hosi “Timor Dijitál 2032”, destaka implementasaun governu eletróniku/dijitál nian ba prestasaun servisu sira governamentál nian, dezenvolve ekonomia inkluziva, hametin setór saúde, edukasaun no agrikultura. Prepara ona mós planu ne’e hodi inklui area adisionál sira ho neineik, tuir prioridade dezenvolvimentu sira governu nian.
Meta prinsipál ida “Timor Dijitál 2032” nian mak atu estabelese ambiente ida ne’ebé di’ak ba susesu dezenvolvimentu teknolojia dijitál no TIK nian iha Timor-Leste. Ba ida-ne’e, sei define pilár estratéjiku dijitál, pilár fasilitadór sira (área sira ne’ebé sei dezenvolve ba implementasaun, adosaun no kriasaun ba valór ida ne’ebé efikás) no prinsípiu estratéjiku fundamentál sira hodi orienta inisiativa hotu-hotu planu nian.
Timor Dijitál 2032 mós sei iha papél importante ida iha promosaun kooperasaun no entendimentu komún entre parte interesada sira hotu, aleinde estabelese baze sira hodi servisu hamutuk ba defeza dijitalizasaun. Planu estratéjiku ne’e propoin mekanizmu koordenasaun no implementasaun, aliña ho prioridade dezenvolvimentu sira governu nian no mós atu otimiza kustu-benefísiu ba investimentu iha dijitalizasaun no TIK, tantu hosi Governu no mós parseiru sira.
