Governu Timor-Leste

Sekretária Estadu ba Promosaun Igualdade (SEPI) organiza Kompetisaun Kulinária iha Rejiaun III ne’ebé konkorente sira mai hosi distritu tolu hanesan Distritu Aileu, Ainaro no Distritu Manufahi. Iha grupu sira-nebé konkore ba kompetisaun refere, Grupu Amizade hosi Distritu Ainaro mak sai nu’udar primeiru lugar iha kompetisaun ne’ebé hala’o iha loron 27, fulan Maiu, Tinan 2010 iha Same, Distritu Manufahi.

Xefe Komisaun Organizadóra ba Kompetisaun Kulinária Sra. Micaela Ximenes, hateten “kompetisaun kulinária ne’e hanesan forma ida atu haforsa unidade entre kabén-nain sira oinsá atu fahe servisu ba malu hodi bele promove igualdade jéneru iha familia ida nia laran.”

Alende atu promove igualidade jéneru, kompetisaun refere atu promove mós kultura kulinária Timor-Leste nian no haberan koñesimentu foin-sa’e sira kona-ba hahán Timor-Leste nian. Kompetisaun hanesan sei hala’o iha rejiaun iha Timor-Leste laran tomak, hosi fulan Maiu to’o fulan Juñu tinan ida ne’e.

Materia iha kompetisaun ne’e mak hanesan na’an manu, na’an karau, na’an fahi, na’an bibi no ikan. Nune’e mós modo tahan hanesan, repollu, alfase, mostarda, pipinu, fehuk-ropa no seluk-seluk tan.

Kompetisaun ne’e loke husi Administradár Distritu Manufahi, Filomeno Tilman, Diretór Diresaun Nasionál Polítika Dezenvolvimentu Jéneru SEPI, Armando da Costa, Diretora Diresaun Nasionál Administrasaun no Finansas, Maria José Sanches no Xefe Gabinete, Angélico Pedro dos Santos.