Governu Timor-Leste

Governu Timor-Leste liu husi Sekretaria Estadu Formasaun Profesionál no Empregu, iha loron 29 fulan Maiu tinan 2010, haruka tan servisu nain Timor-oan hamutuk 43 ba servisu iha Nasaun Korea du Sul..

Sekretáriu Estadu Formasaun Profisionál no Empregu, Bendito Freitas hateten katak, “SEFOPE ho Menistériu Traballu Korea du Sul nian foin lalais ne’e renova nota intendimentu iha Korea, iha loron 14 Maiu tinan 2010 ho durasaun tempu tinan rua. Relasiona ho nota intendimentu refere SEFOPE ho Ministériu Traballu Korea du Sul bele servisu hamutuk hodi fasilita tan servisu nain timor-oan sira ba servisu iha Korea ho kuantidade nebé aumenta to´o 1000, 2000 ou 3000   molok durasaun nota intendimnetu ne’e remata iha tinan 2012.

Iha seremónia despidida ba grupu VIII servisu nain timor-oan iha edifísiu SEFOPE, Sekretáriu Estadu Bendito Freitas husu ba inan-aman husi servisu nain sira atu fó korajen ba sira nia oan atu dedika sira a’an iha servisu no lori imagen diak Timor-Leste nian iha Korea.

Servisu nain timor-oan sira ne’e kompostu husi mane hamutuk 33 no feto hamutuk 10 no atu servisu iha area fábrika nain 10, agrikultura nain 16 no peska hamutuk 17. kompaña Koreanu hamutuk 19 mak simu servisu nain timor-oan nian.