Vizita Ministru Ekonomia no Dezenvolvimentu hala’o reuniaun ho emprezáriu iha Sydney-Austrália
Ministru Ekonomia no Dezenvolvimentu, João Mendes Gonçalves, reprezenta Primeiru-Ministru, Kay Rala Xanana Gusmão, iha reuniaun Konsellu emprezariál iha Sydney, Austrália, loron 17 fulan Maiu .
Iha reuniaun ida ne’e koalia kona-bá koperasaun hamutuk entre Timor-Leste no emprezáriu Austrália nian atu fó kapasitasaun ba funsionáriu Ministériu Ekonomia no Dezenvolvimentu.
Ministru João Mendes Gonçalves mós hateten katak, sei buka apoiu husi parseiru dezenvolvimentu atu iha tempu badak (hahu husi fulan Jullu to’o Janeiru) funsionáriu sira bele hetan formasaun. Nune’e mós Xefe Ezekutivu Austrália Institute of Management (AIM), David Wakeley, hateten sira bele fó programa formasaun kapasitasaun tinan ida (1) nian, maibé sei buka atu fó durante fulan neen (6) nia laran. Iha biban nebá Ministru João Gonçalves, hasoru mós ho Xefe Ezekutivu no Diretór Indústria Alimentár New South Wales (NSW), Sydney-Austrália nian atu bele fó apoiu treinamentu espesifiku kona-ba indústria ai-han.
Além de ne’e, Ministru João Gonçalves, mós halo entrevista ho Rádiu 2000 Timór-Oan hateten katak, dalan nakloke ba emprezáriu no investor sira husi liur atu investe iha Timor-Leste, tanba iha enkontru ne’e Ministru João Gonçalves, konsege hasoru emprezáriu Austrália no Timór-oan balun ne’ebé potensiál tebes atu mai investe iha Timor-Leste.
