Governu Timor-Leste

Iha loron 10 fulan-marsu tinan 2023, Ministru Asuntus Parlamentares no Komunikasaun Sosiál (MAPKOMS), Francisco Martins da Costa Pereira Jerónimo, inaugura ona edifísiu Rádiu Komunitária Lian Manu Koko, iha Munisípiu Ataúru.

Durante ninia diskursu, Ministru Francisco Jerónimo garante katak, maske rádiu komunitária sira nu’udar komunidade nia inisiativa rasik, Governu sei nafatin apoia rádiu komunitária sira, liuhusi asaun sira formasaun nian, atu nune’e komunidade sira bele iha asesu ba informasaun no liberdade espresaun, tuir prevee ona iha Konstituisaun.

Governante ne’e informa mós katak, daudaun ne’e prepara hela diploma ministeriál ida, ne’ebé sei finaliza molok fin mandatu, ho ninia objetivu atu permite transmisaun ba notísia iha nivel nasionál ba área rurál sira.

Administradór Munisípiu Ataúru nian, Domingos Soares, lori komunidade nia naran agradese ba prezensa hosi Ministru ho ninia komitiva no salienta importánsia ba ezisténsia hosi rádiu komunitária ida iha munisípiu atu partilla informasaun iha Ataúru.

Domingos Soares apela ba jornalista sira atu aprezenta informasaun sira ne’ebé loos no faktuál ba públiku atu komunidade bele akompaña situasaun reál atuál no husu mós atu promove uzu ba lian materna atu nune’e jerasaun foun sira bele kontinua aprende no uza sira-nia lian materna.

Prezidente Konsellu Rádiu Komunitária Lian Manu Koko nian, Avelino Pereira, agradese ba Ministru ba apoiu ne’ebé fó ona atu rádiu ida-ne’e bele funsiona ho di’ak.

Serimónia ne’e konta ho partisipasaun husi Prezidente TATOLI, IP, Manuel Pinto, Xefe Gabinete Ministru MAPKOMS, Francisco Ximenes, Diretór Nasionál Promosaun no Dezenvolvimentu Mídia Lokál, José da Costa, autoridade lokál sira no komunidade Ataúru.