Vise-Ministru Interiór hala’o sorumutuk ho ekipa Parlamentu Foin Sa’e
Iha loron 13 fulan-marsu tinan 2023, Vise-Ministru Interiór, António Armindo, akompaña husi Inspetora Gabinete Inspesaun no Auditoria, Benvinda Freitas, Diretór-Jerál Administrasaun no Finansas, Mariano de Araújo no ex-Komisáriu Júlio Hornai, hala’o ona sorumutuk ida ho membru Parlamentu Foin Sa’e sira ( Parlamentu ba Juventude-sigla iha Lian Portugés) atu diskute rekomendasaun kona-ba importánsia hosi koordenasaun interministeriál no konxiensializasaun kona-ba lejizlasaun ne’ebé vigora iha Timor-Leste relasiona ho violénsia doméstika no forma violénsia sira seluk.
Entre rekomendasaun hirak ne’ebé aprezenta ona husi ekipa Parlamentu Foin Sa’e, destaka sujestaun atu aumenta serbisu hamutuk no koordenasaun entre Ministériu Interiór ho entidade sira seluk, liuliu ho autoridade lokál sira, inklui Polísia Nasionál Timor-Leste, hodi sensibiliza komunidade sira kona-ba lejizlasaun ne’ebé relasiona ho violénsia doméstika.
Husu mós serbisu hamutuk entre Ministériu ida-ne’e no ho Sekretaria Estadu Juventude no Desportu no ho Komisaun Reguladora Arte Marsiál sira (KRAM), ho objetivu atu halo regulamentasaun ida rigoroza liu ba atividade ida-ne’e no atu regula ezisténsia husi grupu sira ne’ebé bele kria instabilidade iha komunidade nia leet.
Aleinde ne’e, kona-ba arte marsiál, joven sira husu mós koordenasaun ne’ebé barak liu ho Ministériu Edukasaun, Juventude no Desportu no parseiru dezenvolvimentu ba realizasaun formasaun ba profesór sira atu aplika métodu edukasionál sira ne’ebé la envolve violénsia.
Vise- Ministru Interiór agradese ba rekomendasaun sira husi ekipa Parlamentu Foin Sa’e no kompromete ona atu serbisu hamutuk ho parseiru oioin, inklui UN Woman, hodi promove konsiensializasaun kona-ba kestaun sira ne’ebé relasiona ho feto no labarik sira.
Governante ne’e fó hanoin mós katak Autoridade Protesaun Sivíl, liuhusi Diresaun Nasionál Prevensaun Konflitu Komunitáriu, hala’o beibeik asaun sensibilizasaun ba eskola sira iha Timor-Leste laran tomak kona-ba kestaun sira ne’ebé relasiona ho violénsia doméstika, violénsia bazeia ba jéneru no implementasaun Rezolusaun 1325. Polísia Nasionál Tránzitu mós halo diseminasaun kona-ba lei sira tránzitu nian no lei sira seluk ba eskola sira iha territóriu nasionál tomak.
