Governu Timor-Leste

Primeiru-Ministru Kay Rala Xanana hala’o inaugurasaun ba Sentru Koreiu Timor-Leste nian iha Kintal Ki’ik, Dili, Tersa, 8/06.

Iha nia diskursu Primeiru-Ministru hateten katak, k’solok bo’ot ida ba iha nia Governu tomak atu hamutuk ho Ministru Infraestrutura, hodi mai iha serimonia inaugurasaun edifisiu sentrál Koreius Timor-Leste, tanba ita lembra hahú husi Abril 2000 mak ita inaugura Servisu Postál Timór nian, hanesan pasu desizivu atu hein metin sistema postál nasionál no internasionál nian ne’ebé persiza no importante tebes ba nasaun no nu’udar ita nia Nasaun ne’ebé foin hamri’ik hanesan rai independente ida. Husi 2000-2002 rekursu sira uitoan liu ne’ebé nesesidade sira barak teb-tebes no rekonstrusaun sai nu’udar liafuan ida ne’ebé loron-loron temi kona-ba área sira dezenvolvimentu tomak no setór sira infraestrutura nasionál hotu-hotu nune’e Ttimor-Leste hakat ida ba ida hodi halo rekonstrusaun no mós hadia neneik nia Servisu Postál.

Primeiru-Ministru mós hato’o obrigadu ba Kompañia KOICA no Governu Korea tanba ho sira nia tulun mak bele fó asisténsia ba ita hanesan ba konstrusaun edifisiu furak ida ne’e tanba se sira la ajuda mak ohin sei laiha resepsaun iha neé.

Iha fatin hanesan Ministru Infraestrutura Pedro Lay informa mós katak, edifisiu Sentrál Servisu Postál  nian okupa espasu 1,200 m2 husi terenu ho luan hamutuk 3,900 m2 iha Aldeia Kintál Ki’ik, Distritu Dili. Fundu ne’ebé hodi harii edifisiu Servisu Postál nian mai husi tulun Governu Korea Sul liu husi nia Ajénsia Koperasaun Internasionál, totál orsamnetu hamutuk US$2 M (Millaun 2 dólar amerikanu).

Nia mós hatutan tan katak konstrusaun edifisiu Sentrál Servisu Postál ne’ebé ohin ita inaugura lori tempu fulan 10 hodi kompleta ninia konstrusaun ne’ebé hahú iha fulan Abril, tinan 2009 no remata iha fulan Fevereiru, tinan 2010. Edifisiu Sentrál Servisu Postál ne’e ekipadu ho instalasaun sistema informátika ne’ebé sofistikadu no tuir padraun internasionál ne’ebé sei fasilita di’ak liutan servisu portál nian.

Nune’e mós Prezidente KOICA,  Park Dae Won, iha Inagurasaun ne’e mos informa katak kompañia KOICA fó ajuda dólar milliaun rua (USD 2 M) hodi harii Sentru Koreiu ne’ebé prepara hosi Governu Timor-Leste no fó mós konsulta ne’ebé iha relasaun ho Servisu

Koreiu sira nian no prepara mós ekipamentu teknolojia ho nia objetivu atu moderniza prosesu Servisu Sentrál Koreiu sira nian.