Governu Timor-Leste

Ministru Prezidénsia Konsellu Ministrus, Fidelis Manuel Leite Magalhães, reprezenta Primeiru-Ministru, Taur Matan Ruak, partisipa iha abertura konferénsia sientífika dahuluk Asosiasaun Medisina Veterinária iha Timor-Leste (TLVMA-sigla iha lian Inglés). Eventu ne’e hala’o iha Otél Timor, Dili, hahú husi loron 14 fulan-marsu, no sei kontinua iha loron 16 fulan-marsu.

Konferénsia ne’e ho tema “medisina veterinária nu’udár ferramenta ida hodi hatán ba dezafiu sira saúde públika iha país no rejiaun”, ne’ebé organiza ho apoiu finanseiru husi Departamentu Negósiu Estranjeiru no Komérsiu Governu Australianu (DFAT), Victoria Agriculture-Agro-Bio, Crow Ford Fund, OMNI Animal Health Consultancy no husi Commonwealth of Veterinary Association.

Konferénsia ida-ne’e ninia objetivu mak atu promove hodi partilla koñesimentu sientífiku entre veterináriu timoroan no partisipante sira seluk, aleinde fó informasaun no konxiensializa kona-ba sistema saúde animál iha Timor-Leste. Konferénsia ne’e mós ho objetivu atu oferese oportunidade atu nune’e veterináriu nasionál no país viziñu sira diskute kona-ba situasaun atuál saúde animál iha sira-nia rejiaun no haforsa rede profisionál veterináriu sira iha país laran no iha rejiaun Pasífiku. 

Ema besik 125 maka partisipa iha eventu ne’e, entre ema sira ne’e kompostu husi delegasaun veterináriu sira País Pasífiku nian, membru Asosiasaun Medisina Veterinária Timor-Leste, reprezentante universidade, asosiasaun veterinária estranjeira, entidade governamentál no parseiru dezenvolvimentu sira.

Ministru Fidelis, iha diskursu abertura konferénsia ne’e, hateten “importánsia husi inisiativa ida-ne’e, konta ho delegadu sira husi país rejiaun oioin, tanba iha mundu globalizadu no mudansa klimátika ida-ne’ebé lais, moras foun barak maka la’o, moras sira-ne’e liga ho saúde animál no transmite husi animál ba ema.