Governu Timor-Leste no Embaixadór Índia diskute kooperasaun bilaterál iha área patrimóniu no kultura
Sekretáriu Estadu Arte no Kultura (SEAC), Teófilo Caldas, ohin, loron 02 fulan-fevereiru tinan 2023, iha edifísiu Sekretaria Estadu, simu vizita kortezia husi Embaixadór India ba Indonézia no Timor-Leste, Manoj Kumar Bharti, hodi ko’alia kona-ba kooperasaun bilaterál iha área patrimóniu no kultura.
Lori Governu Timor-Leste nia naran, Sekretáriu Estadu, Teófilo Caldas agradese ba “Governu India ba apoiu tomak ne’ebé oferese ona, liuliu kona-ba grupu artista no artezaun sira, ne’ebé iha tinan 2022 no 2023 partisipa iha interkámbiu kulturál no promosaun ba indústria kriativa no kulturál iha Índia, ne’ebé permite partisipante sira estabelese merkadu foun ba produtu kulturál sira iha país”.
Teófilo Caldas salienta tan katak, “Planu Dezenvolvimentu Estratéjiku Timor-Leste tinan 2011-2030 nian, prevee hanesan prioridade prinsipál ba setór kultura, estabelese sentru kulturál ida, muzeu nasionál ida no akademia arte no indústria kriativa ida. Aleinde ida-ne’e, Governu mós iha prioridade hodi fó apoiu ba prezervasaun patrimóniu kulturál, hanesan konstrusaun uma lulik tradisionál no apoiu ba grupu indústria kriativa no kulturál sira.
Embaixadór Manoj Kumar Bharti ne’e afirma katak, “tinan-tinan Governu indianu oferese bolsa ba sidadaun timoroan sira, iha ne’ebé bolseiru na’in 20 mak termina ona lisensiatura no iha mós esperiénsia serbisu”.
