MAPKOMS no RTTL selebra akordu ba produsaun no emisaun programa “Debate Eskluzivu kona-ba Asaun Governativa”
Ministru Asuntus Parlamentares no Komunikasaun Sosiál (MAPKOMS), Francisco Martins da Costa Pereira Jerónimo, asina akordu ida ho Prezidente Konsellu Administrasaun Empreza Públika Rádiu no Televizaun Timor-Leste (RTTL E.P), José António Belo “Taraleu”, iha loron 28 fulan-fevereiru tinan 2023, iha Palásiu Governu, Dili. 
Akordu ne’e ho ninia objetivu atu halo produsaun no emisaun ba programa “Debate Eskluzivu kona-ba Asaun Governativa”, ne’ebé sei konta ho partisipasaun husi membru Governu no Parlamentu Nasionál, hodi fahe sira-nia vizaun no misaun polítika iha implementasaun programa, planu orsamentál no lejizlasaun sira ne’ebé prodús durante mandatu ne’e.
Akordu ne’e prevee katak programa ne’e, sei halo transmisaun iha RTTL to’o fulan-dezembru tinan 2023.
Serimónia ne’e konta ho partisipasaun husi dirijente no xefia sira MAPKOMS no RTTL E.P nian.
