Governu Timor-Leste

Ministru Asuntus Parlamentares no Komunikasaun Sosiál, Francisco Martins da Costa Pereira Jerónimo, asina ona akordu traballu ida ho Diretór Empreza PT. Global Citra Tama, Edy Hartono Salim, Filiál Dili nian atu harii torre tranzmisaun televizaun iha munisípiu tolu iha país ne’e. Akordu ne’e asina ona iha loron 24 fulan-fevereiru tinan 2023, iha serimónia ida ne’ebé hala’o iha Palásiu Governu, Dili. 

Torre tranzmisaun sira ne’e sei harii iha munisípiu Ainaru, Bobonaru no Lautein, no empreza públika televizaun RTTL maka sei utiliza, ho objetivu atu aumenta asesu informasaun ba komunidade sira-ne’e. Akordu ne’e prevee katak torre refere sei konstroi iha prazu fulan neen, ho valór besik dolar amerikanu millaun ida. Obra ne’e sei hahú iha fulan-marsu mai.

Ministru Francisco Jerónimo salienta katak “ho konstrusaun ba torre hirak-ne’e, komunidade iha rejiaun hirak-ne’e la presiza ona iha antena parabólika hodi asesu ba RTTL no bele utiliza antena komún ida.”

Diretór kompañia ne’ebé responsavel ba konstrusaun torre ne’e hatudu ninia “laran haksolok no agradese ba Governu Timór, liuhusi Ministériu Asuntus Parlamentares no Komunikasaun Sosiál, ba konfiansa ne’ebé atribui ona ba ninia empreza” no reafirma kompromisu atu “termina obra ne’e tuir prazu ne’ebé determina ona”.

Marka prezensa iha serimónia ida-ne’e, responsavel diresaun no xefia sira husi ministériu ida-ne’e no mós jornalista sira.