Ministériu Interiór no Feto ONU hametin kooperasaun iha prevensaun no kombate tráfiku umanu
Governu, liuhusi Ministériu Interiór, iha loron 20 fulan-fevereiru, asina ona memorandu entendimentu ida hodi reforsa kooperasaun institusionál iha prevensaun no kombate tráfiku umanu iha país. Memorandu ne’e asina husi Vise-Ministru Interiór, António Armindo, no husi Xefe Misaun Feto ONU (UN Women) iha Timor-Leste, Nishtha Satyam, iha edifísiu Ministériu Interiór nian.
Tuir akordu ne’e sei dinamiza asaun formasaun ba membru Polísia Nasionál Timor-Leste (PNTL) sira, nune’e mós asaun sosializasaun ho komunidade, liuliu iha área rurál sira, ho foku prinsipál iha prevensaun tráfiku umanu.
Objetivu husi asaun formasaun ne’e maka atu kapasita membru PNTL sira hodi indentifika no atende kazu tráfiku umanu nian, no inklui identifikasaun ba vítima sira, investigasaun ba kazu no protesaun ba vítima sira. Sei aborda mós tema sira hanesan direitu umanu ba vítima sira, importánsia la kriminaliza vítima sira no kooperasaun internasionál ba kombate tráfiku umanu. Asaun sosializasaun ho komunidade ne’e ninia objetivu atu konsiensializa populasaun kona-ba risku no konsekuénsia tráfiku umanu nian, nune’e mós insentiva denúnsia kazu ne’ebé suspeita ba autoridade kompetente sira. 
Vise-Ministru Interiór, António Armindo, hafoin selebrasaun ba akordu ne’e, hateten katak “ida-ne’e nu’udár pasu importante ida hodi reforsa kooperasaun, nune’e ho kolaborasaun hamutuk, bele hala’o formasaun ba membru PNTL sira no mós ba komunidade sira kona-ba tráfiku umanu”.
Na’i-ulun ne’e esplika tan katak “asaun sosializasaun ne’e sei haree liu hodi partilla informasaun kona-ba lei no polítika sira ne’ebé iha matéria ida-ne’e, liuliu iha komunidade sira iha área rurál, hodi fahe informasaun kona-ba prevensaun no kombate tráfiku umanu”.
Governante ne’e hateten katak “importánsia husi asaun sensibilizasaun públika ba ema sira ne’e atubele aumenta sira-nia koñesimentu no kapasidade hodi rekoñese krime tráfiku umanu, tanba karater sensível husi krime ida-ne’e, dalabarak vítima sira la denunsia (hato’o keixa)”.
Na’i-ulun ne’e mós, destaka liu katak “prioridade prinsipál husi programa ne’e maka prevensaun” no nia hateten “hein katak parseria ida-ne’e bele apoia ho efetivu ba Governu hodi sosializa informasaun no kapasita populasaun, atu nune’e komunidade bele iha informasaun ne’ebé adekuada kona-ba tráfiku umanu no mós apoia ba vítima sira”.
Serimónia asinatura memorandu entendimentu ne’e, hetan partisipasaun husi Komandante-Jerál PNTL, Komisáriu Polísia, Faustino da Costa, Diretór-Jerál Administrasaun no Finansas, Mariano de Araújo, Diretór Gabinete Planeamentu Estratéjiku no husi Asesoria (GPEA), Francisco Soares, Diretór Nasionál Finansas, Abel Abreu da Costa Belo no asesór jurídiku sira Ministériu Interiór nian.
