MAPKOMS inaugura Rádiu Komunidade “Lian Proklamadór Francisco Xavier do Amaral” iha Turiskai
Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, liuhusi programa Diresaun Nasionál Promosaun no Dezenvolvimentu Mídia Lokál (DNPDML) iha sesta-feira, loron 17 fulan-fevereiru 2023, inaugura Rádiu Komunidade Lian Proklamadór Francisco Xavier do Amaral, iha postu administrativu Turiskai, munisípiu Manufahi.
Governante MAPKOMS ne’e hateten iha entrevista katak, “objetivu husi lansamentu ida ne‘e tuir vontade komunidade Turiskai nian, ne’ebé hakarak harii Rádiu komunidade atubele fasilita sira iha asesu ba informasaun”.
Ministru Francisco Jerónimo mós konsidera katak, “Governu tenke responde ba pedidu ida ne’e, tanba iha Konstituisaun hateten katak ema hotu-hotu iha direitu hodi asesu ba informasaun, no hanesan dalan ida hodi fó asesu ne’e maka liuhusi harii estasaun rádiu komunidade ne’ebé bele transmite informasaun ba ita-nia komunidade sira iha Turiskai no mós iha suku sira ne’ebé hale’u Turiskai bele hetan/kapta frekuénsia ida ne’e”.
“Esforsu Governu nian no ninia resposta ba nesesidade liuliu relasiona ho komunikasaun, nune’e komunidade siras mós bele hetan informasaun liuliu relasiona ho programa Governu ne’ebé di’ak, tantu sira ne’ebé la’o hela no mós no seidauk hala’o, dehan Ministru Francisco Jerónimo.
Administradór Postu Turiskai, Adriano da Costa iha ninia intervensaun hato’o agradesimentu ba Ministru MAPKOMS, tanba bele harii ona rádiu iha Turiskai, no enfatiza katak hanesan autoridade lokál prontu atu servisu hamutuk hodi fó informasaun ba komunidade sira. Adriano da Costa mós husu ba responsavel sira Rádiu nian atu jere ba oin ho responsabilidade.
Iha tempu hanesan, Joni dos Reis nu’udar Xefe Komisaun Instalasaun agradese ba Governu liuliu MAPKOMS tanba hatán ona proposta hodi harii Rádiu iha Turiskai, tanba proposta ne’e rasik komunidade sira hato’o ona dezde tinan 2019.
Diretór DNPDML, José da Costa hateten katak, Rádiu komunidade Lian Proklamadór ne’e harii husi inisiativa komunidade nian, no tanba ne’e komunidade maka sei sai na’in, nune mós komunidade sira maka tenke garante ninia funsionamentu.
Marka prezensa iha serimónia ne’e, Ministru MAPKOMS ho komitiva, Administradór Postu Turiskai, Komandante Polísia Eskuadra Turiskai, Prezidente Tatoli, reprezentante Veteranu, no mós komunidade.
