Timor-Leste no Indonézia asina memorandu entendimentu lima iha área ekonomia, rekursus umanus no klimatolojia
Iha ámbitu Primeiru-Ministru, Taur Matan Ruak, ninia vizita ofisiál iha Indonézia, ne’ebé akompaña husi membru balu Governu nian, hasoru-malu ho Prezidente Indonézia, Joko Widodo, iha loron 13 fulan-fevereiru tinan 2023, iha Palásiu Prezidensiál Bogor, iha Indonézia, hodi hametin relasaun bilaterál sira entre país rua ne’e no asina memorandu entendimentu lima.
Primeiru-Ministru agradese empeñu Prezidente Indonézia nian hodi habelar relasaun ekonómika entre país rua ne’e, liuliu atu hametin kooperasaun ekonómika iha zona rai-ketan.
Durante sorumutuk ne’e ko’alia mós kona-ba definisaun rai-ketan entre país rua ne’e, no Taur Matan Ruak hateten katak sei hala’o esforsu hotu ne’ebé nesesáriu, atu nune’e kestaun ne’e bele rezolve iha tempu badak.
Xefe Governu hato’o ninia agradesimentu tanba Timor-Leste bele sai observadór ASEAN nian no husu ba Joko Widodo atu kontinua apoiu Timor-Leste iha ezekusaun roteiru ba adezaun plena Timor-Leste nian.
Durante sorumutuk ne’e, Ministra Negósius Esntranjeirus no Kooperasaun, Adaljiza Albertina Xavier Reis Magno no ninia omóloga indonézia, Retno Marsudi, asina deklarasaun konjunta ida kona-ba harii zona ekonómika iha área fronteirisa sira, ho objetivu atu estabelese zona komérsiu livre transfronteirisu.
Ministru Ensinu Superiór, Siénsia no Kultura, Longinhos dos Santos no Ministru Edukasaun, Kultura, Peskiza no Teknolojia Indonézia nian, Nadiem Makarim, asina memorandu kooperasaun ida iha área ensinu superiór.
Asina mós memorandu entendimentu ida kona-ba kooperasaun téknika industriál, husi Ministru José Lucas do Carmo ho ninia omólogu Agus Gumiwang Kartasasmita.
Ministru Transporte no Komunikasoins Timor-Leste nian, José Agustinho da Silva no Dwikorita Karnawati, husi Ajénsia Meteorolojia, Klimatolojia no Jeofízika Indonézia nian, asina memorandu entendimentu ida kona-ba kooperasaun iha meteorolojia, klimatolojia no jeofízika.
Ikusliu, asina mós memorandu entendimentu ida kona-ba kooperasaun iha dezenvolvimentu rekursus umanus no kapasidade institusionál nivel eleitorál, husi Prezidente Komisaun Nasionál Eleitorál Timor-Leste nian, José Belo no Xefe Komisaun Eleitorál Jerál Indonézia nian, Hasyim Asy'ari.
