Konsulta PEDN iha Lakló: “Ukun A’an Tinan sanulo Povu sei enfrenta buat barak”
Primeiru-Ministru Xanana Gusmão hala’o konsulta PEDN, ba dala 36 Iha Sub-distrito Lakló. Loron 27 fulan Maiu tinan 2010 molok atu hahú konsulta Komunidade no Povu Sub-distritu Lakló simu PM Xanana Gusmão tuir tradisaun no uzu kostume Lakló nian, hodi oferese mama fatin no fatuk ahi ba PrimeiruMinsitru.
Tuir Administradór Sub-distritu, Filomeno Cabral, katak, Sub-distritu Lakló natar barak, potensia peska no turizmu, indústria, mármer, esplorasaun florestál hodi husu atu transforma hodi bele hadia povu nia moris ba loron aban-bairua nian.
Iha fatin hanesan Xefi Suku Uma-Kaduak, Manuel da Cunha husu atu hadia kanál irigasaun hodi bele kanaliza mai iha sira nia aldeia Manuho tanba tempu udan sempre hetan estragus husi mota. Tanba ne’e mak to’o ohin loron komunidade iha fatin refere labele halai natar.
Igreja Katólika Laclo, liu husi Pe. Áureo Reinaldo Soares, husu ba Governu atu bele ajuda rehabilita Igreja refere, tamba Igreja laiha posibilidade atu bele hadia, hodi nune’e Igreja Lakló bele hakat ona ba oin atu bele sai Parókia.
PM Xanana Gusmão esplika katak “Bainhira laiha partisipasaun povu nian iha funu ita labele ukun-a’an, agora ukun-a’an tinan 10 ona, maibé povu sei enfrenta buat barak. Tanba ne’e mak preokupasaun sira-nebé iha Estadu tenki tau matan iha kurtu prazu nia laran.”
Sub-distritu Lakló kompostu husi suku 4, aldeia 16 ho totál populasaun 7.605 ho lian mak hanesan, koalia Galolen, Ilimanu no Mambae.
