Governu Timor-Leste

Ministru Finansas, Rui Gomes, reprezenta Estadu Timor-Leste ho reprezentante Ajénsia Kooperasaun Internasionál Japaun (JICA-sigla Inglés), ITO Mimpei, asina akordu subvensaun públiku (Grant) ho montante millaun $ 37,5, iha Auditóriu Kay Rala Xanana Gusmão, Ministériu Finansas, iha loron 08 fulan Fevereiru 2023.

Akordu ne’e ho nia objetivu hodi finansia konstrusaun terminál pasajeiru foun ho nia sistema abastesimentu bee mo’os inklui instalasaun fasilidade apoiu sira no ekipamentu sira iha Aeroportu Internasionál Prezidente Nicolau Lobato (AIPNL).

Ministru Finansas haktuir mós katak, “ba faze primeiru Governu asegura ona finansimentu husi   ADB millaun $ 135, husi  Austrália  millaun  $73,4 no husi JICA millaun $37,5 no  kontrapartida husi  Governu ba kompontente hotu hamutuk  millaun $52  nune’e totál orsamentu ba primeira faze hamutuk milliaun $297,9. Ho orsamentu ne’e ita bele hahú ona ita-nia prosesu aprovizionamentu konkursu para atu harii ita-nia Aeroportu Internasionál Prezidente Nicolau Lobato.”

Orsamentu ne’ebé aseguradu husi ADB atu finansia projetu estensaun pista aterajen, konstrusaun torre-kontrole tráfiku aéreu no reabilitasaun fasilidade sira seluk, no mós orsamentu husi Austrália sei uza hodi konstrui asesu estrada ba terminál pasajeiru, pakote kombate inséndiu, edifísiu kuarantena animál no planta, edifísiu ba kuidadu saúde primária, depózitu ba kombustível, eletrisidade no iluminasaun públiku, fasilidade bee mo’os, fatin estasionamentu karreta no motor inklui zona drop off terminál pasajeiru iha Aeroportu Internasionál Prezidente Nicolau Lobato. Nune’e mós, Governu Timor-Leste aloka tán millaun $ 52 hodi finansia ba akizaun rai no kompensasaun.

Serimónia asinatura ne’e akompanã husi Ministru Justisa, Tiago Amaral Sarmento, Ministru Obras Públikas, Abel Pires da Silva, Ministru Transporte no Komunikasaun, José Agostinho da Silva, Ministru Negósiu Estranjeiru no Kooperasaun Interinu, Julião da Silva, no Vise-Ministru Finansas, António Freitas.