Governu Timor-Leste

Edisaun da-5 husi inkéritu“Estadu Sudeste Aziátiku”, ne’ebé fó sai iha loron 9 fulan-fevereiru liubá, husi Sentru Estudu ASEAN Institutu ISEAS-Yusoh Ishak nian, iha Singapura, hatete katak “ho forma esmagadora, hatene katak 61,5% husi ASEAN apoiu  adezaun Timor-Leste nian”.

Tuir sondajen ne’e “espresaun apoiu maka’as liu mai husi Kamboja ho 93,3% no Filipinas ho 69,7%”. 67,8 %, respondente husi Indonézia apoia adezaun Timor-Leste nian ba ASEAN.

Husi partisipante sira ne’ebé mak apoia admisaun Timor-Leste nian, “48,7% hatete katak membru foun ida sei reforsa unidade no sentralidade ASEAN nian”.

Entrevistadu hamutuk 9,9%, “fiar katak adezaun Timor-Leste nian sei aumenta komérsiu no investimentu intrarejionál”.

Entrevistadu barak husi Vietname (70,0%) fiar katak ho adezaun Timor-Leste nian sei aumenta unidade no sentralidade ASEAN, aas liu husi média ASEAN nian ho 48,7%.

La konkorda adezaun Timor-Leste nian ba ASEAN hamutuk 15,8% de’it no 11,4% iha opiniaun katak sei laiha mudansa iha ASEAN.

Hodi hala’o inkéritu ida ne’e, Institutu ISEAS-Yusoh Ishak halo ona peskiza totál hamutuk ema 1.308 husi país sanulu Sudeste Aziátiku nian, entre akadémiku, investigadór, reprezentante sira setór privadu no finanseiru, reprezentante sosiedade sivíl, organizasaun naun governamentál no meiu komunikasaun, funsionáriu entidade governamentál nian no reprezentante husi organizasaun rejiaun no internasionál sira.

Inkéritu ne’e hala’o durante semana ualu, husi loron 14 fulan-novembru tinan 2022, to’o loron 6 fulan-janeiru tinan 2023, iha ne’ebé partisipante sira hatán ona tópiku pergunta nian hamutuk 54 kona-ba temátika sira ne’ebé relasiona ho jeopolítika rejionál no situasaun polítika, ekonómika no sosiál iha rejiaun nian.