Primeiru Ministru vizita traballadór timoroan sira iha Programa Mobilidade Laborál iha Austrália
Iha ámbitu ninia vizita ofisiál iha Austrália, Primeiru-Ministru, Taur Matan Ruak, iha loron 9 fulan-fevereiru tinan 2023, vizita sidadaun nasionál sira ne’ebé maka serbisu, tuir Programa Mobilidade Laborál, iha viveiru plantas Girraween, empreza PlantSmith nian, pertense ba Asosiasaun Agrikultura Territóriu Norte Austrália (NT Farmers), ne’ebé lokaliza iha Howard Springs, Territóriu Norte Austrália nian. 
Delegasaun Timor-Leste ne’e simu husi na’in ba empreza no Prezidente NT Farmers nian, Simon Smith, ne’ebé halo aprezentasaun badak ida kona-ba atividade empreza, NT Farmers, kestaun bioseguransa no kona-ba fornesimentu produtu agríkola amigu ambiente nian (la ho pestisida).
Responsavel NT Farmers nian ko’alia liu kona-ba importánsia husi Programa Mobilidade Laborál no fó-sai hanoin atu hasa’e númeru vaga anuál ba traballadór timoroan sira iha setór agrikultura.
Xefe Governu hasoru-malu ho timoroan sira ne’ebé hahú serbisu iha fulan outubru liubá, tuir vizita NT Farmers nian mai Dili no ne’ebé manifesta empreza nia interesse relasiona ho NT Farmer iha rekrutamentu, atu forma no kapasita traballadór timoroan sira ba setór agrikultura ne’ebé importante, ho potensiál boot ba Timor-Leste, la’ós de’it iha nível haruka osan husi imigrante sira maibé mós atu dezenvolve projetu agríkola foun ne’ebé sei hahú husi eis-traballadór timoroan sira uainhira fila mai Timor.
Primeiru-Ministru, akompaña husi Ministra Negósiu Estranjeiru no Kooperasaun Timor nian, Adaljiza Magno, Embaixadora Timor-Leste nian iha Kamberra, Inês Almeida, Embaixadór Austrália nian iha Timor-Leste, Bill Costello no membru delegasaun nasionál sira-seluk.
