Estabilidade Nasionál Fundamentál ba Dezenvolvimentu Nasionál
Xefe Governu hateten katak “estabilidade fundamentál tebes ba dezenvolvimentu nasionál tanba atu dezenvolve nasaun ida-ne’e presiza kontribuisaun ema hotu nian.” Hateten Primeiru-Ministru Kay Xanana Gusmão, iha Sub-distritu Laklubar, Distritu Manatutu iha loron 25 fulan Maiu, wainhira aprezenta Plano Estratéjiku Dezenvolvimentu Nasionál (PEDN)
Hatán ba preokupasaun no sujestaun ne’ebé hato’o hosi Administradór Sub-distritu no Xefe suku sira, Xefe ezekutivu ne’e esplika katak, “Liu husi PEDN sei iha desentralizasaun no husu ba xefe suku sira atu aprezenta proposta dezenvolvimentu ba tinan 2011 ho prioridade sira-nebé mak suku ida-idak iha molok loron 31 fulan Jullu tinan ida-ne’e. Nune’e mós Primeiru-Ministru garante katak estrada ne’ebé liga Sub-distritu Laklubar ba suku Fatuk Makerek merese hetan atensaun urjente hosi nia Governu iha tinan ida-ne’e.”
Iha vizita ne’e Primeiru- Ministru akompaña husi Vise-Ministru Infrasestrutura, José Manuel Carrascalão, Sekretáriu Estadu Seguransa, Francisco Guteres, Sekretáriu Estadu Asuntus Antigu Kombatentes no Libertasaun Nasionál, Mário Nicolau dos Reis, Diretór Jerál Finansas Estadu, Ministériu Finansas, Francisco Soares no hetan observasaun mos husi Reprezentante Espesiál Sekretáriu-Jerál ONU, Sra. Ameera Haq.
