Primeiru-Ministru hala'o vizita traballu ba Austrália
Primeiru-Ministru, Taur Matan Ruak, segunda ohin dezloka ba Commonwealth Austrália, iha nia vizita ofisiál dahuluk ba rai li’ur.
Vizita entre loron 6 to’o 9 fulan-fevereiru ne’e, ho objetivu atu hametin liután relasaun bilateral no kooperasaun ho Austrália hanesan País viziñu. Objetivu vizita ne’e nian mós atu agradese ba Governu no povu Australianu ba sira-nia apoiu no jenerozidade ba Governu Timor-Leste durante mandatu VIII Governu Konstitusionál nian, liuliu iha situasaun COVID-19, hodi apoiu vasina no espesialista sira mai Timor-Leste, no inklui mós apoiu ba kalamidade ne’ebé akontese iha tinan 2020 no 2021.
Durante estadia iha Austrália, Xefe Governu Timoroan sei hasoru malu ho nia omólogu Australianu, Anthony Albanese, sei halo enkontru kortezia ho Governadór Jerál, David Hurley, no ho personalidade importante sira seluk País ne’ebá nian.
Vizita Xefe Governu nian ne’e loloos hala’o iha fulan-fevereiru tinan 2022, maibé tanba Primeiru Ministru pozitivu tiha COVID-19, nune’e vizita refere adia tiha no foin bele realiza fali.
Iha vizita ne’e, Xefe Governu sei hetan akompañamentu hosi Ministra Negósius Estranjeirus no Kooperasaun, Sra. Adaljiza Magno.
Xefe Governu ho delegasaun sei to’o fali rai laran iha loron 10 fulan-fevereiru tinan 2023.
