Avaliasaun anuál konjunta hosi Movimentu SUN Timor-Leste
Sekretariadu nasionál hosi movimentu globál ba melloria nutrisaun, ne’ebé koñesidu iha lian ingleza “SUN Movement” ka “Scaling Up Nutrition Movement”, iha loron 3 fulan-fevereiru tinan 2023, organiza ona semináriu ida ba avaliasaun konjunta kona-ba progresu sira país nian atu atinje meta nasionál sira nutrisaun nian.
Scaling Up Nutrition “SUN Movement” ne’e nu’udar movimentu polítiku ida, ne’ebé estabelese iha tinan 2010 husi entidade governamentál, ajénsia no organizasaun sira, harii bazeia ba prinsípiu katak ema hotu-hotu iha direitu ba alimentasaun no nutrisaun ne’ebé adekuadu.
Sekretariadu permanente hosi movimentu ida-ne’e nia sede iha Jenebra, Suisa, no, to’o ohin loron, iha país hamutuk 65 mak adere ona, ne’ebé serbisu hamutuk hodi hetan métodu ida-ne’ebé transformadór loloos no rezolve problema nutrisaun iha sira-nia país.
Semináriu ida-ne’e hanesan biban ida ba hotu-hotu ne’ebé mak envolve iha melloria nutrisaun nasionál, tantu iha nivel governamentál nomos naun governamentál, hodi reflete hamutuk, ho maneira partisipativa no transparente, kona-ba progresu sira ne’ebé alkansa ona durante tinan ida ikus ne’e hodi atinje meta nasionál sira nutrisaun no seguransa ai-han nian, ne’ebé aliña ho prioridade setoriál no nasionál.
Ministru Prezidénsia Konsellu Ministrus, Fidelis Manuel Leite Magalhães, ne’ebé reprezenta Primeiru-Ministru, Taur Matan Ruak, iha eventu abertura ne’e, afirma filafali “kompromisu nasionál atu atinje objetivu sira dezenvolvimentu sustentavel (ODS) iha tinan 2030”, liuliu ida-ne’ebé kona-ba ODS 2, objetivu Timor-Leste nian mak atu halakon hamlaha, atinje seguransa ai-han, nutrisaun di’ak no promove agrikultura ida ne’ebé sustentavel”.
“Tanba ne’e, Timor-Leste ninia objetivu to’o tinan 2030 atu asegura asesu universál ba alimentasaun segura no nutritiva nomos halakon forma hotu-hotu hosi malnutrisaun”, destaka Fidelis Magalhães.
Governante ne’e defende mós katak “atu rezolve problema boot kona-ba nutrisaun iha Timor-Leste, presiza planu asaun konjunta ida ne’ebé ema hotu-hotu no instituisaun sira aseita no apoia”.
