Governu Timor-Leste

Ministra Negósius Estranjeirus no Kooperasaun, Adaljiza Magno, sei partisipa iha Sorumutuk Konsellu Koordenasaun ba Asosiasaun Nasaun sira Sudeste Aziátiku nian, (ÁSEAN) ba da-32 no iha Sorumutuk Ministrus Negósius Estranjeirus ASEAN, ne’ebé sei hala’o iha Sekretariadu Organizasaun nian, iha Jakarta, Indonézia. Delegasaun nasionál ne’e sei iha Jakarta hosi loron 1 to’o loron 10 fulan-fevereiru.

Ida-ne’e maka nu’udar sorumutuk dahuluk prezidénsia indonézia nian iha ÁSEAN no mós nu’udar partisipasaun dahuluk Timor-Leste nian, hanesan observadór, husi kedas desizaun iha Simeira ikus organizasaun nian, iha fulan-novembru tinan kotuk, hodi simu Timor-Leste, uluk nana’in, hanesan Estadu-Membru ba da-11.

Iha sorumutuk sira-ne’e, sei diskute ajenda oin-oin, inklui prioridade sira Prezidénsia Indonézia nian no akompañamentu ba rezultadu husi Simeira ÁSEAN ba da-40 no da-41, ne’ebé realiza ona iha tinan 2022.

Iha sorumutuk sira-ne’e, sei iha mós objetivu atu promove diálogu konstrutivu ida entre parte sira no kooperasaun ida ÁSEAN nian ne’ebé forte liu, hodi garante pás no estabilidade iha rejiaun Indo-Pasífiku no responde ba dezafiu rejionál no globál oin-oin, hanesan kestaun jeopolítika no impaktu kontínuu husi Covid-19, nune’e mós dezastre naturál no krize finanseira, enerjétika no alimentár nian sira.

Durante períodu ida-ne’e, Ministra Adaljiza Magno sei realiza mós enkontru bilaterál sira ho país-membru sira husi ÁSEAN kona-ba perspetiva kooperasaun nian.

Akompaña Ministra iha vizita ofisiál ne’e maka, Xefe Gabinete Ministra Negósius Estranjeirus no Kooperasaun, Diretora-Jerál ba Asuntus ÁSEAN no ekipa, no Diretór ba Asuntus Sudeste Aziátiku no Oseánia.

Hafoin partisipa iha sorumutuk ÁSEAN nian, iha Jakarta, Ministra Adaljiza Magno sei akompaña Primeiru-Ministru, Taur Matan Ruak, iha vizita ofisiál ba Austrália.