Vise-Ministru Interiór no Embaixadór Japaun diskute kooperasaun iha área seguransa nian
Vise-Ministru Interiór, António Armindo, iha loron 30 fulan-janeiru tinan 2023, simu vizita kortezia husi Embaixadór Japaun iha Timor-Leste, Testuya Kimura, iha Ministériu Interiór, hodi ko’alia kona-ba kooperasaun iha área seguransa nian, liuliu atu kapasita Unidade Polísia Marítima (UPM), Polísia Nasionál Timor-Leste (PNTL).
Vise-Ministru Interiór António Armindo agradese ba “Governu Japaun ninia disponibilidade atu apoia Timor-Leste iha área seguransa, liuliu iha nivel Polísia Marítima, ho fornese formasaun no ro’o ida atu tulun hodi hatán ba krime iha rai-laran no atu proteje tasi”. 
Embaixadór Tetsuya Kimura afirma katak “defeza iha área marítima nu’udar servisu kompleksu ida ne’ebé presiza meius no kapasitasaun ba servisu sira” no tanba ne’e “Japaun sei apoia ho asesoria, formasaun no ro’o ida ba UPM, atu halo patrullamentu iha zona marítima nian”.
Diplomata ne’e hatutan tan katak ida-ne’e “nu’udar projetu daruak Japaun ho Ministériu Interiór” no hateten “hein katak projetu ne’e iha susesu hanesan”.
