Timor-Leste partisipa iha Sesaun Konsellu Ezekutivu OMS nian ba da-152
Delegasaun Governu Timor-Leste nian ida, ne’ebé lidera husi Ministra Saúde, Odete Maria Freitas Belo, partisipa iha Sesaun Konsellu Ezekutivu (EB152) Organizasaun Mundiál Saúde nian (OMS) ba da-152, ne’ebé hala’o hosi loron 30 fulan-janeiru to’o loron 7 fulan-fevereiru, iha Jenebra, Suisa.
Konsellu Ezekutivu OMS ne’e kompostu husi ema tékniku kualifikadu iha área saúde nian hamutuk na’in-34, ema ida-idak dezigna husi Estadu Membru ida ne’ebé hili husi Asembleia Mundiál Saúde. Estadu Membru sira sei eleitu ba mandatu tinan tolu. 
Timor-Leste integra ba Konsellu Ezekutivu OMS nian iha periodu tinan 2021 to’o tinan 2024, ne’ebé reprezenta husi Ministra Odete Belo.
Konsellu Ezekutivu OMS nian maka responsavel hodi define ajenda ne’ebé sei diskute iha Asembleia Mundiál Saúde, iha fulan-maiu. Asembleia Mundiál Saúde ne’e nu’udar órgaun ne’ebé foti desizaun OMS nian, ne’ebé responsavel ba polítika, programa no orsamentu OMS nian, nune’e mós ba eleisaun Diretór-Jerál.
EB152 OMS nu’udar biban importante ida hodi diskute kona-ba prevensaun ba moras ne’ebé la hada’et no kompromisu polítiku hosi Estadu partisipante sira atu redús moras ba populasaun mundiál.
Iha sesaun abertura, Diretór-Jerál OMS, Tedros Adhanom Ghebreyesus, aprezenta ona rezultadu sira husi relatóriu ikus organizasaun nian no louva Governu Repúblika Demokrátika Timor-Leste liuhusi ninia kompromisu polítiku ba prevensaun moras la hada’et sira hanesan moras fuan, kankru, diabetes, no sira seluk, ho aumentu impostu ba tabaku, álkool, masin-midar no hemun midar sira foin daudauk ne’e.
Iha ninia intervensaun ba sesaun dahuluk, Ministra Odete Belo agradese ba apresiasaun pozitiva husi Diretór-Jerál OMS iha Timor-Leste no nia agradese ba tulun husi Diretór Rejionál OMS nian ba Sudeste Aziátiku ne’ebé fó apoiu ba Timor-Leste.
Ministra Saúde aprezenta mós kompromisu nasionál ne’ebé reforsa Sistema Nasionál Saúde, foka serbisu Timor-Leste nian hodi hamenus pandemia COVID-19 no kompromisu atu asegura implementasaun Polítika Saúde Globál, Rejionál no Nasionál nian atu bele atinje Kobertura Universál Saúde no Objetivu sira Dezenvolvimentu Sustentavel nian.
