Governu ho apoiu husi Japaun no PAM distribui asisténsia ai-han ba inan isin-rua liu rihun 33 no inan-fó-susu sira ne’ebé vulneravel liu iha munisípiu neen
Vise-Ministra Solidariedade Sosiál, Signi Chandrawati Verdial, akompaña husi Embaixadór Japaun nian iha Timor-Leste, Tetsuya Kimura no reprezentante husi Programa Alimentár Mundiál iha Timor-Leste, Cecilia Garzon, lansa programa ida kona-ba distribuisaun ai-han ba inan isin-rua no inan-fó-susu sira ne’ebé vulneravel liu, iha loron 5 fulan-janeiru tinan 2023, iha Suku Wenunuk, Postu Administrativu Metinaru, Munisípiu Dili.
Programa Ministériu Seguransa Sosiál no Inkluzaun nian konta ho kontribuisaun finanseira husi Governu Japaun, ho valór dolar amerikanu millaun 3, no ho apoiu husi Programa Alimentár Mundiál (PAM) iha ninia implementasaun.
Programa ida-ne’e, maka kompleta programa Bolsa da Mãe – Jerasaun Foun, prevee distribuisaun ai-han nutritivu ba inan isin-rua liu rihun 33 no inan-fó-susu sira ne’ebé vulneravel liu iha munisípiu Baukau, Kovalima, Dili, Ermera, Manatutu no Manufahi, ho objetivu atu kombate malnutrisaun.
Objetivu husi distribuisaun foos fortifikadu, koto no mina-te’in atu garante ba benefisiária sira hetan makro no mikronutriente ne’ebé presiza, nune’e mós ho satisfasaun ba nesesidade kalórika, atu bele kombate malnutrisaun.
Ein jerál sei distribui foos tonelada 1594, koto tonelada 213 no mina-te’in tonelada 106.
Lansamentu programa ne’e konta mós ho partisipasaun husi Administradór Postu Administrativu Metinaru, Fausto Soares Dias no Diretór no ekipa Sentru Solidariedade Sosiál Munisípiu Dili nian.
