Lansamentu Fatuk Dahuluk ba Unidade Foun Pediatria no Kuidadu Koronáriu Intensivu iha Hospital Nacional Guido Valadares
Primeiru-Ministru, Taur Matan Ruak, akompaña husi Vise-Primeiru-Ministru, José Maria dos Reis no Ministra Saúde, Odete Maria Freitas Belo, lansa fatuk dahuluk ba konstrusaun edifísiu Unidade foun Pediatria no Kuidadu Koronáriu Intensivu iha Hospital Nacional Guido Valadares (HNGV), Dili, iha loron 26 fulan-janeiru tinan 2023. 
Konstrusaun ba unidade foun ida-ne’e, ho andár lima, ne’ebé sei harii iha tinan rua nia laran, sei permite hadi’a asesu no kualidade kuidadu espesializadu ne’ebé presta iha HNGV, ho atensaun espesiál ba internamentu kazu emerjénsia no urjénsia pediátrika nian. Ne’e sei permite mós hodi hadi’a resposta nasionál ba surtu esporádiku no emerjente denge, kólera no surtu sira seluk ho impaktu boot ba saúde públika, liuliu entre bebé foin moris, labarik no adolexente sira.
Xefe Governu ne’e, iha ninia intervensaun durante serimónia ne’e, nia konsidera katak, inisiativa ida-ne’e “ importante no istórika tebetebes hodi moderniza infraestrutura HNGV nian no hadi’a kondisaun ba pasiente no kondisaun serbisu ba pesoál saúde”.
Primeiru-Ministru apela mós ba kompañia ne’ebé responsavel ba konstrusaun edifísiu ne’e, atu bele “kumpre prazu ne’ebé define ona no ho kualidade ne’ebé ezije ona ba dezenvolvimentu infraestrutura ida-ne’e”. 
Partisipa mós iha serimónia ne’e Vise-Ministru Saúde, Bonifácio Mau Coli dos Reis no Sekretáriu Estadu Terras no Propriedades, Eldino Rodrigues dos Santos, nune’e mós reprezentante sira husi Embaixada Xina no kompañia konstrutora.
