Enserramentu Formasaun Prosedimentu Lejizlativu Governu nian ba edisaun da-1
Ministru Prezidénsia Konsellu Ministrus, Fidelis Manuel Leite Magalhães, ne’ebé reprezenta Primeiru-Ministru, Taur Matan Ruak, akompaña husi Vise-Reitór Universidade do Minho, Profesór Doutór Luís Amaral, hala’o ona serimónia enserramentu ba Programa Formasaun Prosedimentu Lejizlativu Governu nian ba edisaun da-1. 
Formasaun ne’e, hahú iha loron 21 fulan-novembru tinan 2022, organiza husi Gabinete Apoiu Jurídiku (GAJ) Prezidénsia Konsellu Ministrus, ne’ebé kolabora ho Universidade do Minho, Portugál.
Formasaun iha Prosedimentu Lejizlativu Governu nian konta ho módulu sira ne’ebé hanorin husi manorin Universidade do Minho no sesaun temátika sira ne’ebé hanorin husi jurista sira Prezidénsia Konsellu Ministrus no Gabinete Primeiru-Ministru nian. Formasaun ne’e, dirije ba pontu fokál sira husi gabinete jurídiku liña Ministeriál sira nian.
Iha ninia intervensaun, Ministru Fidelis Magalhães hatudu ninia laran-ksolok tanba “haree partisipante sira ne’ebé joven hela servisu ba futuru ita-nia país nian” no afirma katak aleinde hein atu formasaun ne’e “bele util ba sira-nia dezempeñu profisionál”, formasaun ne’e mós sei “konstrui sidadaun ne’ebé di’ak-liu, atentu liu, partisipativu no ezijente liu” tanba “ho dalan ida ne’e de’it mak ita bele hamutuk konstrui Estadu ida ne’ebé di’ak liu.
Ministru defende katak “kualidade lejizlasaun ne’e desiziva liután hodi kumpre propózitu sira hotu Estadu nian”, tanba ne’e “Governu ida-ne’e hadi’a ona kualidade lejizlasaun nu’udar ninia prioridade ida iha tinan hirak ikus ne’e”. 
“Ba Governu ida-ne’e, reforma prosedimentu lejizlativu no ninia implementasaun loron-loron maka prova husi ita-nia asaun Demokrasia, mehi ne’ebé anima ona ita iha luta ba independénsia nasionál no ne’ebé maka ohin loron ita hotu tenke luta loron-loron”, Ministru ne’e akresenta.
Durante serimónia ne’e, entrega sertifikadu formasaun nian no aprezenta ferramenta eletrónika ida ba prosedimentu lejizlativu Governu nian ne’ebé iha hela faze dezenvolvimentu.
Eventu ne’e hetan mós partisipasaun husi Ministru Asuntus Parlamentáres no Komunikasaun Sosiál, Francisco Martins da Costa Pereira Jerónimo, Ministru Transportes no Komunikasoins, José Agustinho da Silva, reprezentante husi liña ministeriál no pontu fokál sira husi gabinete jurídiku ne’ebé partisipa iha formasaun ne’e. 
