Primeiru-Ministru apresenta PEDN iha Sub-Distritu Ainaro
Primeiru-Ministru, Kay Rala Xanana Gusmão, akompaña hosi Sekretáriu Estadu Pekuáriu, Valentino Varela, Diretór Jerál Finansas Estadu, Ministériu Finansas, Francisco Soares, Administradór Distritu Ainaro, Manuel Pereira, Vigáriu Parokia Santa Maria Ainaro, Pe. Bento Soares Pereira no kumitiva tomak, simu hosi populasaun Sub-distritu Ainaro, iha Simbisa, Ainaro.
Antes lia-nain ho autoridade lokál tomak simu, dahuluk, lia-nain ne’ebé hein uma lulik konvida S.E. Primeiru-Ministru, Kay Rala Xanana Gusmão, hodi natais kultura Distritu Ainaro nian, foin tiha ne’e Primeiru-Ministru akompaña hosi Administradór Sub-distritu Ainaro, sai mai iha liron.
Bainhira atu simu ho tradisaun, dahuluk povu Ainaro tara tais ba iha Xefe Governu no nia reprezentante hosi kumitiva, foin lia-nain sira hahú sergala, tebedai no dadolin semanu tuir tradisaun Ainaro nian hodi simu S.E. Primeiru-Ministru.
Remata tiha hosi lia-nain sira, grupu drum-band hosi estudante Sekundária Katólika Ainaro nian hodi ba to’o iha fatin konsulta PEDN, to’o tiha iha fatin konsulta PEDN estudante sira sei toka inu pátria hosi grupu drum-band. Konsulta PEDN iha Sub-distritu Ainaro la’o ho di’ak hotu maske mosu dúvida no preokupasaun hosi reprezentante povu balun kona-ba konsulta PEDN ka halo kampaña partidu.
Bainhira atu fo tempu ba S.E. Primeiru-Ministru, dahuluk Administradór Sub-distritu Ainaro halo aprezentasaun jeográfika no rezultadu Projetu Pakote Refrendu (PPR), iha Sub-distritu Ainaro. PPR hala’o iha Sub-distritu Ainaro maske enfrenta situasaun klima no rekursus umanus ne’ebé limitadu, maibé PPR la’o di’ak no kualidade iha Sub-Distritu Ainaro.
Iha esplikasaun Planu Estratéjiku Dezenvolvimentu Nasionál (PEDN), Primeiru-Ministru, Kay Rala Xanana Gusmao, esplika katak planu ne’ebé mai halo konsulta ne’e atu mai hadia povu nia móris, tanba Estadu harii tiha ona agora tenke tau matan ba povu nia móris no hanesan Líder ba Governu ida-ne’e, promete ba Parlementu Nasionál katak sei aprezenta Planu Estratéjiku Nasionál nian atu hala’o dezenvolvimentu.
Hafoin rona tiha esplikasaun hosi Sua Eselénsia Primeiru-Ministru, Kay Rala Xanana Gusmão, autoridade lokál ne’ebé besik liu iha povu, hato’o difikuldade ba Xefe Governu mak li-liu infraestrutura bázika hanesan estrada, ponte, liña eletrisidade, bee- mós, saúde, edukasaun, liña komunikasaun.
