Governu Timor-Leste

Ministru Administrasaun Estatál, Miguel Pereira de Carvalho, akompaña husi Sekretária Ezekutiva Sekretariadu Tékniku PNDS Nasionál no Administradór Munisípiu Aileu nian, iha loron 19 fulan-janeiru tinan 2023, inaugura edifísiu Programa Nasionál Dezenvolvimentu Suku (PNDS) iha munisípiu Aileu, ne’ebé reabilita ho montante dolar amerikanu rihun tolunulu.

Iha ninia intervensaun, Ministru Miguel Pereira de Carvalho salienta katak, “ba dahuluk, Sekretariadu Tékniku PNDS iha edifísiu rasik iha nivel munisipál”, enkuantu “iha munisípiu sira seluk sei utiliza lai edifísiu Administrasaun ka Autoridade Munisipál”.

Ho razaun ida-ne’e, Ministru defende katak “Ministériu Administrasaun Estatál presiza reforsa instituisaun ida-ne’e liuhusi atribuisaun ba edifísiu públiku sira, tanba ámbitu PNDS nian sei to’o ba nivel postu, suku no aldeia iha territóriu nasionál tomak”.

Miguel Pereira de Carvalho hateten mós katak, objetivu PNDS nian mak atu hakbesik administrasaun públika ba ita-nia komunidade iha nivel suku no aldeia, ho alokasaun rekursus ne’ebé garante katak PNDS fornese infraestrutura públika ne’ebé nesesária ba suku sira, hanesan estrada rurál, reabilitasaun ba eskola, postu saúde, rezidénsia sira ba pesoál saúde no programa “Uma Naroman ba Suku”. 

Governante ne’e akresenta katak, konstrusaun ba uma sira iha ámbitu projetu “ Uma Naroman ba Povu” husi programa PNDS, ne’ebé konta ho orsamentu ne’ebé aloka husi Governu, hahú husi tinan 2021 no iha tinan 2022 númeru uma aumenta no sei kontinua aumenta iha tinan ida-ne’e atu bele kobre ba país tomak.

Iha okaziaun ida-ne’e, Ministru Administrasaun Estatál fahe sertifikadu ba xefe suku no ekipa jestaun suku nian.

Serimónia ne’e konta ho partisipasaun husi autoridade lokál sira, komandante PNTL, ekipa PNDS nian husi Aileu no Ermera, Diretór-Jerál no tékniku sira.