Governu Timor-Leste

Ministru Administrasaun Estatál (MAE), Miguel Pereira de Carvalho, akompaña husi Prezidente Komisaun Nasionál Eleisoins (CNE - Sigla iha lian portugés), Alcino Barris no Diretór-Jerál Sekretariadu Tékniku Administrasaun Eleitorál (STAE), Acilino Manuel Branco, hala'o ona lansamentu ofisiál resenseamentu eleitorál no atualizasaun baze dadus nian ba eleisaun parlamentár tinan 2023, iha loron 17 fulan-janeiru liubá, iha edifísiu STAE, iha Kaikoli, Dili.

Resenseamentu eleitorál no atualizasaun baze dadus ne'ebé eziste sei hala'o iha postu administrativu 66 país nian, inklui iha Munisípiu foun Ataúru no iha diáspora.

 Durante eventu ne'e, fahe mós kartaun ba pontu fokál sira hosi partidu polítiku ida-idak.

Ministru Administrasaun Estatál, informa ba jornalista sira katak “Konsellu Ministrus sei analiza proposta rezolusaun Governu nian ida kona-ba resenseamentu iha diáspora no hafoin hetan aprovasaun, sei hahú hala'o resenseamentu iha estranjeiru, no prevee katak sei hahú iha fulan-fevereiru ne’e nia rohan, ho ekipa téknika sira STAE nian ne’ebé sei ba Austrália, Portugál, Inglaterra no Koreia Súl, no sira seluk”.

“Kona-ba Indonézia no Filipina, to'o ohin loron nunka hala’o votasaun, Governu tenke deside karik inklui ka lae país rua ne'e no sei presiza asegura koordenasaun ho nasaun rua ne'e atu bele hala'o eleisaun iha ne’ebá, maibé ekipa téknika ida ne'ebé komposta husi reprezentante STAE no Ministériu Negósius Estranjeirus no Kooperasaun nian, dezloka ona ba nasaun rua ne'e atu halo estudu no foti informasaun kona-ba eleitór sira ne’ebé bele tuir eleisaun", Ministru ne'e hatutan.

Serimónia lansamentu ne'e konta mós ho partisipasaun husi Komandante PNTL Munisípiu Dili nian, dirijente sira husi administrasaun públika, servisu sentrál no lokál sira, administrasaun direta no indireta, pontu fokál husi partidu polítiku sira, akadémiku no estudante sira, autoridade lokál no lideransa komunitária sira.