Ministériu Saúde hala’o lansamentu Kampaña Nasionál Integrada ba Imunizasaun
Ministra Saúde, Odete Maria Freitas Belo, akompaña husi governante sira seluk, parseiru dezenvolvimentu no autoridade lokál sira, halo lansamentu ofisiál ba Kampaña Integrada Nasionál ba Imunizasaun Rotina, iha loron 12 fulan-janeiru tinan 2023, iha suku Tapo Memo, Munisípiu Bobonaru. 
Kampaña saúde ida-ne’e, dirije ba labarik sira ho idade menus husi tinan lima, inklui vasinasaun pneumokósika (PCV) ba protesaun bebé no labarik sira hodi kontra moras grave, hanesan pneumonia no meninjite, ne’ebé kauza husi baktéria pneumokoku, vasinasaun kontra sarampu, kontra rubéola no Póliu. Kampaña ne’e, inklui mós distribuisaun suplementu vitamina A, ai-moruk kontra lombriga no vasinasaun kontra COVID-19 ba ema ho idade liu tinan 12.
Kampaña ne’e sei hala’o mós iha munisípiu hotu-hotu.
Ministra Saúde esplika katak, “kampaña vasinasaun integrada ida-ne’e foka liu ba labarik hotu-hotu iha Timor-Leste ho idade tinan lima mai kraik”, Ministra defende mós “ importánsia ba kampaña ida-ne’e hodi aumenta imunizasaun no prevensaun ba moras”. Governante ne’e afirma mós katak, “atividade vasinasaun ida-ne’e ho objetivu atu prevene mortalidade infantíl” no destaka katak “Ministériu Saúde defende asesu universál ba servisu saúde preventiva no kurativa, hanesan afirmasaun ba direitus umanus, promosaun ba hadi’a saúde no hamenus ki’ak no injustisa ne’ebé boot, tuir estratéjia hodi kaer-metin lema katak la husik ema ida ba kotuk”. 
Odete Freitas Belo fó hanoin mós katak “Timor-Leste iha tinan 2022, konsege atinje de’it taxa vasinasaun kompleta ho média 77% ba labarik sira ho idade tinan lima mai kraik. Iha munisípiu haat atinje ona vasinasaun kompleta menus husi 70%, ida-ne’e hatudu katak, pelumenus labarik liu 20% maka seidauk simu vasina.
Partisipa iha lansamentu kampaña ne’e, Ministru Asuntus Parlamentares no Komunikasaun Sosiál, Francisco Jerónimo, Ministru Edukasaun, Juventude no Desportu, Armindo Maia, Vise-Ministru Administrasaun Estatál, Lino Torezão, Autoridade Munisipál, autoridade suku, komunidade suku Tapo Memo, ekipa Ministériu Saúde no parseiru dezenvolvimentu sira, liuliu Organizasaun Mundiál Saúde, UNICEF, DFAT no USAID.
