Komemorasaun loron Restaurasaun Independensia ba dawaluk iha Same, Manufahi
Primeiru-Ministru akompaña hosi Ministra Finansas, Emília Pires, Sekretáriu Estadu Pekuária, Valentino Varela, Embaixadór Japao, Kiwao Kitahara, Segundu Komandante Polisia, Afonso de Jesus no Administradór Distritu Manufahi, Filomeno Tilman tuir isár bandeira ba selebrasaun loron restaurasaun Independénsia Timor-Leste, 20 Maio, iha Same, Manufahi.
Bainhira Primeiru-Ministru, Xanana Gusmão to’o iha fatin serimónia loron 20 Maio ba dawaluk, lia-nain hosi uma lisan sira iha Same fó hatais uluk ho hatais tuir kultura Same nian bainhira simu nia nai-ulun no bainaka ida, hafoin simu ho tebedai hosi labarik sira no bidu hodi hakat ba to’o iha kareta ne’ebé prepara hodi ba to’o iha kampu demokrasia hodi tuir isár bandeira.
Iha komemorasaun loron restaurasaun Independénsia, Primeiru-Ministru, Kay Rala Xanana Gusmão, sai hanesan komandante isára bandeira ba iha seremónia komemorasaun 20 Maiu, iha Distritu Manufahi ne’e´bé hanesan knua asua’in Dom Boaventura ne’ebé uluk luta, hakarak Timor-Leste ukun rasik a’an no ikus mai hatutan hosi Kay Rala Xanana Gusmão hodi lori povu ba ukun-a’an.
Iha seremónia komemorasaun loron restaurasaun Independénsia ba dawaluk iha Distritu Manufahi, Sekretáriu Estadu Pekuária, Valentino Varela, mak lee diskursu Sua Eselénsia Prezidente Repúblika, DR. José Ramos Horta, nian iha komemorasaun ne’e.
Serimónia komemorasaun loron restaurasaun Independénsia ne’e, Primeiru-Ministru, Kay Rala Xanana Gusmão, la hato’o nia diskursu, maibé iha minutu ida ba selénsiu, PM Xanana diriji katak, ‘ohin ita halo tinan 8 ukun-a’ an, ema rihun ba rihun mate namkari iha rai laran, ita hakruk ba sira atu tau matan nafatin mai ita atu lori prosesu ukun-a’an ne’e ba di’ak, onra no glória ba mártire sira libertasaun Timor-Leste nian’.
Partisipa iha komemorasaun loron restaurasaun Independénsia ba dawaluk ne’e, povu hosi Suku 8 iha Sub-distritu Same, funsionáriu públiku iha Distritu Manufahi, estudante hosi eskola Primária to’o Sekundária, Polisia Estasaun Sub-distritu Same no Distritu Manufahi, juventude, arte marsiál husi grupu sira, emprezariu sira lokál no Nasionál no autoridade lokál Manufahi tomak.
