Governu Timor-Leste

Primeiru-Ministru, Kay Rala Xanana Gusmão, akompaña husi Sekretáriu Estadu Kultura, Virgilio Smith, Sekretáriu Estadu Eletrisidade, Bee-mós no Urbanizasaun, Januário Pereira no Administradór Distritu Manufahi, Filomeno Tilman no komitiva tomak, simu husi populasaun Sub-distritu Alas, iha Dotik.

Antes atu simu ho tradisaun Sub-distritu Alas, dahuluk, Primeiru-Ministru simu hosi lia- nain ho tara tais no dadolin Sub-distritu Alas nian hodi simu Primeiru-Ministru, Kay Rala Xanana Gusmão ho nia komitiva tomak hodi ba to’o iha Kadunan Uma Kaik-Meik, ne’ebé simu deretamente hosi liurai-feto Uma Kaik-Meik ba iha fatin ne’ebé prepara ona hodi deskansa menutu rua nia laran, hafoin ne’e nain ba Kadunan Uma Kaik-Meik fó hatais ba Primeiru-Ministru ho sasan lulik Kadunan Uma Kaik-Meik nian no tara tais hanesan prezente hodi hakat ba iha kadeira ne’ebé prepara tiha ona atu hulan PM ba to’o iha fatin konsulta PEDN.

Antes atu fo tempu ba Sua Eselénsia Primeiru-Ministru, Kay Rala Xanana Gusmão, dahuluk Administradór Sub-Distritu Alas hato’o relatóriu no jeografia ba iha Primeiru-Ministru ho nia komitiva tomak katak, Sub-distritu Alas iha Suku 6 no Aldeia hamutuk 15.

Nune’e mós kona-ba Projetu Pakote Refrendum (PPR), iha balun di’ak no kualidade no balun ladi’ak hodi rehabilita fali, alende ne’e mós husu ba Sua Eselénsia Primeiru-Ministru atu fo atensaun ba iha ponte liga ba mota tanba iha Sub-distritu Alas iha mota ida, ain ba hitu no to’o agora la iha ponte, aumenta enfremeira, ahi eletrisidade no estrada ne’ebé difikulta ba povu atu lori produtu lokál ba fán iha kapitál Manufahi, liu-liu hosi suku Tutuluru nian.

Iha esplikasaun Planu Estratéjiku Dezenvolvimentu Nasionál (PEDN), iha infraestrutura bázika hitu ne’ebé mak atu hadia povu nia móris tanba Estadu harii tiha ona no komemorasaun ba dawaluk ona hanesan hada blok walu, agora oinsá mak atu tau matan ba povu nia móris no planu estratéjiku nasionál nian atu hala’o dezenvolvimentu.

Hafoin rona tiha esplikasaun hosi Priemeiru-Ministru, Kay Rala Xanana Gusmao, Xefe Suku sira hato’o preokupasaun mak hanesan hadia ponte, estrada, liña eletrisidade no hadia área túrizmu atu nune’e povu bele fán produtu lokál hodi hetan rendimentu.

Hatan ba preokupasaun sira ne’e mak Primeiru-Ministru fó hanoin ba komunidade Sub-distritu Alas katak, atu loke área túrizmu presiza estrada di’ak, bainhira estrada di’ak aeroportu tenke di’ak nune’e ema bele mai sela’e ita konvida ema atu mai ema mós sei la mai tanba kondisaun ladi’ak.