Timor-Leste ho Korea do Sul Hametin Kooperasaun Bilateral
Governu Timor-Leste liu husi Sekretáriu Estadu Formasaun Profissionál no Empregu (SEFOPE) Bendito dos Santos Freitas akompaña husi Diretór Nasionál Empregu José Maria da Costa Soares no Assistente Gabinete SEFOPE Liliana dos Santos hala’o vizita ofisiál ba Korea Sul ho objetivu, atu hametin liu tan kooperasaun bilateral entre nasaun RDTL ho Nasaun Korea do Sul aleinde ne’e halo renovasaun mós ba MOU–EPS 2010 (Memorandum of Understanding) ho Ministériu Traballu Korea Sul nian kona-ba programa haruka trabalhadór Timor-Leste ba servisu iha Korea – EPS (Employment Permit System).
Iha Vizita ne’e Sekretáriu Estadu ho delegasaun hala’o mós enkontru ho Presidente HRD (Human Resources Development Service of Korea), Mr. Yu, Jae Soub, hodi esplika koná-ba atividade preparasaun trabalhadores Timor-Leste wainhira atu ba servisu iha Korea. Sekretáriu Estadu Hatutan tan katak prezensa HRD-Díli importante tebes tanba iha tempu badak SEFOPE sei extende tan formasaun língua Korea iha parte Leste no Oeste hodi bele fó oportunidade ba ema hotu nebé hakarak hetan servisu ba Korea.
Iha Parte Seluk Presidente HRD hato’o katak “HRD interesante tebes atu suporta hodi simu trabalhadór Timor oan mai servisu iha Korea, no hato’o mós ideas kona-ba preparasaun ba trabalhadór Timor-Leste nian hanesan meius importante hodi bele hetan impresaun diak hosi patraun Kompañia iha Korea. Tanba iha kompañia barak seidauk hatene trabalhadór husi Timor-Leste. Aleinde ne’e hato’o mós esperiensia, katak Korea mós uluk haruka nia trabalhadór sira ba servisu iha rai liur, maibé ikus bele susesu dezenvolve sira nia nasaun. Entaun Timor-Leste ho rekursu naturais ne’ebé iha atu bele maneza ho didiak hodi nune’e nasaun Timor-Leste bele dezenvolve no povo tomak bele hetan moris diak.
Númeru trabalhadór sira nebé maka passa KLT 2009 ema nain 515 no númeru trabalhadór sira nebé servisu ona iha Korea hamutuk ema nain 105 (iha area Manufacturing no Fishing). Tuir planu iha futuru sei haruka tan trabalhadór 197 nebé hala’o hela preliminary training no OEO (Overseas Employment Office) hodi prepara ba KLT nebé tuir ona kursu lian Korea nian.
