Ministru Fidelis partisipa nudar oradór iha diskusaun internasionál ne’ebé organiza husi Universidade Bengkulu
Ministru Prezidénsia Konsellu Ministrus, Fidelis Manuel Leite Magalhães, iha loron 11 fulan-novembru tinan 2022, partisipa ona nudar oradór, liu husi videokonferénsia, iha diskusaun internasionál da-2, husi Universidade Bengkulu, Indonézia nian. 
Ministru Fidelis fahe ninia intervensaun ba asuntu rua, ida kona-ba dezenvolvimentu komunikasaun sosiál iha Timor-Leste no ida seluk kona-ba Perspektiva demokratizasaun iha Timor-Leste no perspektiva kultura iha Indonézia.
Iha asuntu dahuluk Ministru Fidelis halo enkuadramentu kona-ba setor komunikasaun sosial nasionál no salienta katak “iha Timor-Leste, Governu la halo limitasaun ba meius komunikasaun sosiál/media. Governu respeita no valoriza independénsia meius komunikasaun sosiál no liberdade espresaun”. 
Destaka mós katak “Timor-Leste hetan ona klasifikasaun hanesan nasaun demokrátika liu iha Sudeste Aziátiku”. “Iha índise liberdade imprensa Timor-Leste sai husi 86 iha tinan 2011/12 ba 17 iha 2022”. “haree ba liberdade imprensa, iha deit nasaun Europa 11 ho klasifikasaun aas liu duke Timor-Leste”, “ida-ne’e akontese tamba Timor-Leste komprometidu ho demokrasia no liberdade espresaun”.
Ministru Fidelis apresenta mós komparasaun ho prátika demokrátika Indonézia no Timor-Leste nian ne’ebé bazeia ba kultura no mai husi antepasadu sira hanesan Nahe Biti iha Timor-Leste no musyawarah untuk mufakat iha Indonézia. No afirma katak “Indonézia no Timor-Leste tenke sente orgullu husi de musyawarah untuk mufakat no Nahe Biti hanesan prátika demokrátika sira husi sira nia nasaun”.
