Ministru Fidelis Magalhães nomeadu hanesan enviadu estraordináriu ba COP27
Prezidente Repúblika, José Ramos-Horta, tuir Dekretu nu. 86/2022, husi loron 24 fulan-outubru, nomeia ona Ministru Prezidénsia Konsellu Ministrus, Fidelis Manuel Leite Magalhães, hanesan enviadu estraordináriu Prezidente Repúblika nian hodi partisipa iha Sesaun da-27 Konferénsia Partes Konvensaun-Kuadru Nasoins Unidas nian kona-ba Mudansa Klimátika (COP27), ne’ebé sei hala’o husi loron 6 to’o 18 fulan-novembru tinan 2022, iha Sharm el-Sheik, iha Egito. 
Dekretu ne’e esplika katak nomeasaun ne’e hala’o tambá “haree ba impossibilidade Prezidente Repúblika nian atu desloca ba Egito hodi partisipa iha Simeira ne’e” no haree ba “importánsia boot husi asuntu sira ne’ebé sei trata iha eventu refere no mós ba importánsia atu iha reprezentasaun husi Repúblika Demokrátika Timor-Leste nian iha eventu altu nível ida-ne’e”.
Iha Konferência ne’e sei reúne líder polítiku sira husi nasaun ne’ebé hola parte iha Konvensaun-Kuadru Nasoins Unidas nian kona-ba klima (UNFCCC), organizasaun sira husi sosiedade sivil, sientífika no akadémika, hodi promove diskusaun kona-ba kauza no efeitu husi alterasaun klimátika no mós atu define meta no akordu sira nasionál no global hodi fó resposta ba dezafiu ne’e.
Delegasaun nasionál, ne’ebé lidera husi Ministru Prezidénsia Konsellu Ministrus, inklui mós Sekretáriu Estadu Ambiente, Demétrio do Amaral de Carvalho.
