Governu Timor-Leste

Governu Konstitusionál VIII, iha loron 21 fulan-outubru tinan 2022 hala’o Retiru ba Membru Governu sira, iha Salaun Nobre, Ministériu Negósius Estranjeirus no Kooperasaun. Retiru ne’e foka liuliu ba reajustamentu Planu Estratéjiku Dezenvolvimentu tinan 2011-2030 (PED) nian. Prosesu reajustamentu ida-ne’e hahú ona iha fulan-juñu tinan 2021 to’o ohin loron.

Retiru ida-ne’e lidera husi Primeiru-Ministru Taur Matan Ruak, no inklui aprezentasaun kona-ba asuntu oioin ne’ebé iha relasaun ho planeamentu ba dezenvolvimentu nasionál iha Timor-Leste. 

Iha retiru ida-ne’e, Komisaun Interministeriál ba reajustametu PED, hamutuk ho Ministériu Planu no Ordenamentu (MPO) hala’o aprezentasaun ida kona-ba Ezbosu Planu Estratéjiku Dezenvolvimentu Reajustadu tinan 2023-2038 (PED-R 23-38), ne’ebé ekipa téknika husi Centro de Planeamento Integrado (CPI) nian maka elabora.

CPI halo Ezbosu Planu Estratéjiku Dezenvolvimentu Reajustadu ida-ne’e liuhusi prosesu naruk, hanesan: i) análize ba dokumentu sira planu dezenvolvimentu nian (Planu Dezenvolvimentu Nasionál ‘Vizaun tinan 2020 nian’, Planu Estratéjiku Dezenvolvimentu tinan 2011-2030 nian, Programa Governu Konstitusionál VIII, Objetivu Dezenvolvimentu Sustentavel tinan 2030 nian; no Matadalan ba Objetivu Dezenvolvimentu Sustentavel; ii) diskusaun téknika espesializada; iii) diskusaun ho liña Ministeriál sira; iv) konsulta ho parte interesada sira, hanesan Prezidente Repúblika, Prezidente Parlamentu Nasionál, Prezidente Tribunal Rekursu, Eis-titulár hosi Órgaun Soberania sira, reprezentante hosi Igreja Katólika no lider hosi konfisaun relijioza sira, komunidade akadémika, sosiedade sivíl (inklui grupu feto, grupu foin-sa’e no grupu hosi ema vulneravel sira); v) konsulta públika iha munisípiu 12 no RAEOA, no estudu kona-ba progresu, dezafiu no prioridade sira dezenvolvimentu nasionál nian.

Aprezentasaun tuirmai husi Komisaun Interministeriál no MPO relasiona ho Estudu ba Lei-Kuadru Planeamentu Estratéjiku nian, ho objetivu atu kria proposta enkuadramentu legal ida ne’ebé regula prosesu planeamentu ba dezenvolvimentu ekonómiku-sosiál tomak iha Timor-Leste.  Enkuadramentu legál foun ida-ne’e sei kesi entidade relevante hotu-hotu ba planeamentu no planu estratéjiku hirak ne’ebé bele prepara no aprova iha futuru hodi lori dezenvolvimentu integradu ida ba ita-nia rain, iha nivel nasionál no iha nivel rejionál, munisipál no suku.

Iha biban hanesan, Ministériu Planu no Ordenamentu mós halo aprezentasaun ida kona-ba Modelu Nasionál Ordenamentu Territóriu (MNOT) nian. MNOT ne’e, sei dezenvolve Planu Nasionál ba Ordenamentu Territóriu (PNOT) nu’udar instrumentu ida ne’ebé sei estabelese opsaun prinsipál sira ba organizasaun no dezenvolvimentu territóriu nasionál, liuhusi definisaun ba modelu sistema urbanu nian, rede transporte sira, infraestrutura no ekipamentu interese nasionál nian no espesializasaun produtiva ba espasu, tuir sira-nia karaterístika no potensialidade sira.

Komisaun Interministeriál ba Reajustamentu Planu Estratéjiku Dezenvolvimentu nian ne’e harii husi Governu Konstitusionál VIII, liuhusi Rezolusaun Governu Númeru 81/2021, 21 fulan-juñu, ho mandatu hodi halo Reajustamentu Planu Estratéjiku Dezenvolvimentu Nasionál tinan 2011-2030 nian, atu garante katak estratéjia sira ne’ebé adota ona nu’udar objetu konsensu nasionál nian, atu planu ida-ne’e funsiona nu’udar instrumentu ida ba projesaun nasionál no garantia ba koezaun no estabilidade nasionál, no atu garante kumprimentu rigorozu ba programa, hodi nune’e  bele atinje objetivu estratéjiku sira.

Komisaun ida-ne’e lidera husi Primeiru-Ministru, Taur Matan Ruak, no inklui vise-Primeiru-Ministru no Ministru Planu no Ordenamentu, vise-Primeira-Ministra no Ministra Solidariedade Sosiál no Inkluzaun, Ministru Prezidénsia Konsellu Ministrus, Ministru Koordenadór Asuntus Ekonómikus, Ministru Administrasaun Estatál, no Ministra Negósius Estranjeirus no Kooperasaun. Servisu tékniku hotu-hotu ne’ebé lidera husi Vise-Primeiru-Ministru no Ministru Planu no Ordenamentu,  José Maria dos Reis.

Governu Konstitusionál VIII halo reajustamentu ba Planu Estratéjiku Dezenvolvimentu Nasionál tinan 2011-2030 nian tanba konxiente katak implementasaun Planu Dezenvolvimentu Nasionál tinan 2002-2020 ‘Vizaun tinan 2020 nian’ no Planu Estratéjiku Dezenvolvimentu tinan 2011-2030 nian konsege atinje progresu balun, hanesan kreximentu ekonómiku ho díjitu rua, redusaun kiak no dezenvolvimentu infraestruturas. Maibé, ekonomia nafatin depende maka’as ba setór petrolíferu no problema kiak multinasionál no dezigualdade nian mós kontinua mosu maka’as tebes. Fatór importante seluk ne’ebé dudu Governu Konstitusionál VIII atu halo reajustamentu ida-ne’e maka rezultadu husi avaliasaun independente ba implementasaun Planu Estratéjiku Dezenvolvimentu tinan 2011-2030 nian  ne’ebé hatudu katak husi Meta sira ne’ebé define iha Planu Estratéjiku Dezenvolvimentu Nasionál tinan 2011-2030 nian balu la atinje tuir prazu ne’ebé prevee ona no meta seluk ne’ebé la relevante ona tanba mudansa ne’ebé akontese ona iha sosiedade no mundu, hanesan mudansa klimátika no pandemia COVID-19.