Governu Timor-Leste

Iha sesta-feira semana kotuk, Membrus Komisaun Interministerial ne’ebé kompostu husi Ministru Finansas, Rui Augusto Gomes no Ministru Transporte no Komunikasaun, José Agostinho hala’o Sorumutuk ho reprezentante sira husi PMU Tibar, Autoridade Aduaneira, Autoridade Tributária, Diresaun Nasionál Transporte Marítima, APORTIL, Kuarantina, Ministériu Saúde, Ministériu Obras Públikas, Servisus Imigrasaun, EDTL no Entidades Estadu relevantes no deside data "Go Live" Portu Baía Tibar iha 30 Setembru 2022.

Ho "Go Live" ne’e signifika hahú 1 Outubru ba oin, Portu Díli sei taka ba operasaun Roo Kontentór. Servisus ne’e muda ba Portu Baía Tibar.

Portu Díli sei kontinua hala’o operasaun hodi simu roo pasajeirus doméstika no roo kruzeiru ne’ebé lori turista internasionál sira.

Lansamentu ofisiál ba Portu Baía Tibar sei hala'o iha 30 Novembru 2022. Eventu ne’e sei koinside ho Komemorasaun Loron Independénsia Timor-Leste nian.

Bainhira hahú halo operasaun, Portu Tibar sei troka Portu Díli hodi fasilita movimentu importasaun no esportasaun sasán ho kapasidade karga kontentór hamutuk millaun ida kada tinan. Portu ne’e inklui ka’is ida ho bersus rua ne’ebé sei uza hodi redus atrazu iha libertasaun kontentór inklui kustu tranzasaun atu fasilita efisiénsia servisu alfandegáriu no atividade komérsiu.

Efisiénsia hirak ne’e konsidera hanesan pasu importante ida ba Ministériu Finansas iha ámbitu Reforma Fiskál no Jestaun Finansas Públikas. Efisiénsia hirak ne’e mós sei ajuda Governu liuhusi Ministériu Finansas atu kolekta reseitas ho maneira ida ne’ebé lailais, justu no transparente.

Portu foun modernu ne’e sei fasilita Timor-Leste ninia konektividade marítima iha rejiaun Ázia, liga Timor-Leste ba merkadu komérsiu globál no hasa’e liután Timor-Leste ninia asesu komérsiu ba merkadoria sira hanesan agrikultura, turizmu, peskas, pekuária nomós indústria sira seluk – dalan ida atu ajuda Timor-Leste diversifika ninia produsaun.

Konstrusaun Portu Tibar ho modalidade PPP husi parseria entre Governu Timor-Leste ne’ebé aloka millaun $130 iha Fundu Viabilidade (VGF, sigla Inglés) no Timor Port, subsidiáriu husi Bolloré ho millaun $150, hamutuk millaun $280 ba faze inísiu husi totál investimentu estimativu millaun $500 ba tinan 30.

Projetu Portu Tibar hanesan projetu interese públiku ne’ebé lidera husi Komisaun Interministeriál ho nia membru atuál mak Ministru Finansas, Ministru Obras Públikas, Ministru Planu no Ordenamentu no Ministru Transporte no Komunikasaun.

Enkuantu Portu Díli sei transforma ba pontu Turizmu no Komersiál. Projetu re-Dezenvolvimentu no Komersializasaun Portu Díli ne’e hetan ona aprovasaun husi Konsellu Ministrus iha 28 jullu 2021.

Iha loron 8 fulan-setembru 2021, Konsellu Ministrus análiza filafali planu dezenvolvimentu ba reestruturasaun no modernizasaun Portu Díli, ne’ebé hetan ona deliberasaun iha Sorumutuk Konsellu Ministrus iha loron 28 fulan-jullu tinan 2021. Maibé, tanba iha alterasaun balun iha faze redasaun finál, presiza submete filafali ba deliberasaun foun.

Konsellu Ministrus aprova hodi adopta modalidade finansiamentu PPP atu dezenvolve tuir kuadru legál no regulamentu ne'ebé mak vigora. Planu dezenvolvimentu ba reestruturasaun no modernizasaun Portu Díli prevee katak hafoin transferénsia funsaun husi portu karga ba portu foun Tibar, sei halo konversaun ba mariña no portu kruzeiru. Projetu nasionál ida-ne’e lokalizadu iha área estratéjiku sentrál iha sidade Díli, ninia funsaun iha ligasaun marítima ba populasaun sira husi Oekusi no Ataúru, no potensiál atu sai polu dinamizadór turizmu mariña iha Timor-Leste.

Projetu re-Dezenvolvimentu no Komersializasaun Portu Díli sei administra husi Autoridade Portuária Timor-Leste (APORTIL) ne’ebé tutela iha Ministériu Transporte no Komunikasaun.

Projetu ne’e ho modalidade PPP ho kustu estimativu millaun $50 resin, atu transforma Portu Díli sai hanesan pontu Turizmu ne’ebé sei inklui fasilidade kulturál, rekreativu no rezidensiál. Projetu ne’e sei kria empregu no fornese oportunidade komersiál ba rezidente sira iha Díli, halo kapitál Timor-Leste sai furak liután hodi bele atrai turista doméstiku no turista internasionál iha futuru.

Aproveita oportunidade ida-ne’e, Prezidénsia Konsellu Ministrus konvida maluk Jornalista-sira atu iha 30 Setembru bele ba partisipa no halo kobertura.