Governu Timor-Leste

Sub-Distritu Hatu-Udu iha Suku rua hanesan, Suku Leolima no Suku Foho Ailiku, Iha Aldeia 16, totál populasaun 10.648 no maioria povu nia móris 99 % la’o no to’os.

Primeiru-Ministru, Kay Rala Xanana Gusmão, akompanha husi Sekretariu Estadu Pekuáriu, Valentino Varela, Administradór distritu Ainaro no kumitiva tomak simu deretamente husi Administradór sub-distritu Hatu-Udo, autoridade lokál no povu sub-distritu Hatu-Udo, iha loron, tersa feira liu bá (19-5-2010), ba iha fatin konsulta Planu Estratéjiku Dezenvolvimentu Nasionál (PEDN).

Iha lia nain rua mak fó hatais Primeiru-Ministru ho hatais kultura Hatu-Udo nian, hafoin ne’e simu ho tebedai husi labarik ki’ik oan sira hodi akompanha bá no haklalak viva hodi hakat ba iha fatin konsulta PEDN ne’ebé prepara ona.

Iha esplikasaun kona-ba PEDN, Primeiru-Ministru katak “tempu to’o ona atu muda ukun nain sira nia hanoin tanba inan-aman sira nafatin ba kee rai hodi fó han ba oan sira. Estadu iha obrigasaun atu tau matan ba labarik Timor-oan sira liu husi nesesidade báziku no hari’i infraestrutura diak. Estadu tenke hadia infraestrura hodi ajuda povu no povu ajuda nia aan rasik”.

Hafoin rona tiha esplikasaun husi Primeiru-Ministru, autoridade lokál ne’ebé móris ho povu hato’o sira nia preokupasaun hanesan, falta infremeiru iha uma móras, estrada liga ba aldeia, aumenta sala eskola premária, eletrisidade, uma pouzada sub-distritu Hatu-Udo, ponte Ai-assa ne’ebé tohar. Hatan ba preokupasaun ne’e Primeiru-Ministru hatan katak, povu nia preokupasaun hanesan hau nia preokupasaun ne’ebé tau ona iha PEDN no ohin hau mai esplika ba imi hotu kona-ba planu estratéjiku ne’ebé rekoilla ona husi povu iha tinan 2001.

Planu ne’e bainhira halo konsulta hotu maka sei lori ba apresenta iha Parlamentu Nasionál atu aprova. Se’e karik aprova maka ita sei implementa maibe la aprova ita rai hela maibe PEDN ne’e atu hala’o dezenvolvimentu ba povu liu husi tinan lima-lima.