PKM, MKAE no MNEK analiza prioridade sira iha prosesu adezaun nian ba OMK no ASEAN no ba melloria ambiente negósiu nian
Iha loron 12 fulan-setembru tinan 2022, Ministru Prezidénsia Konsellu Ministrus, Fidelis Magalhães, Ministru Koordenadór Asuntus Ekonómikus, Joaquim Amaral no Ministra Negósius Estranjeirus no Kooperasaun, Adaljiza Albertina Xavier Reis Magno no ekipa téknika ida-idak nian, hala’o sorumutuk ida iha Hotel Novo Turismo.
Sorumutuk ne’e ho objetivu atu asegura koordenasaun entre entidade governamentál sira no hodi halo análize hamutuk prioridade sira iha prosesu adezaun nian ba ASEAN no ba Organizasaun Mundiál Komérsiu (OMK) no mós kona-ba prosesu atu hadi’a ambiente negósiu nian.
Durante sorumutuk ne’e, governante no ekipa téknika sira diskute kona-ba atividade no inisiativa lejizlativa pendente sira ne’ebé iha tempu badak, presiza aprovasaun husi Konsellu Ministrus, atubele kumpre rekizitu no kompromisu nesesáriu sira ba prosesu adezaun ne’e nian.
