Governu Timor-Leste

Iha loron 7 fulan-setembru tinan 2022, Ministru Defeza, Filomeno da Paixão de Jesus no ninia omólogu australianu, Richard Marles, asina akordu kooperasaun ida iha área defeza, iha serimónia ida ne’ebé hala’o iha Parlamentu Nasionál Komunidade Austrália nian, iha Kamberra.

Asinatura ba akordu ne’e testemuña husi Prezidente Repúblika, José Ramos-Horta no husi Primeiru-Ministru australianu, Anthony Albanese.

Akordu ida-ne’e ho objetivu atu estabelese protesaun, responsabilidade no priviléjiu ba malu ne’ebé país ida-idak sei fó ba militár sira nasaun rua ne’e nian bainhira sira hela iha territóriu ne’e. Ho nune’e, militár timoroan sira ne’ebé halo operasaun, ezersísiu ka treinu iha Austrália sei simu protesaun, responsabilidade no priviléjiu hanesan ho protesaun, responsabilidade no priviléjiu ne’ebé pesoál australianu sei simu iha Timor-Leste.

Sei permite mós atu Austrália no Timor-Leste hasa’e kooperasaun iha área defeza no seguransa nian, liuliu iha área marítima, haree ba ninia fronteira ne’ebé hamutuk no zona marítima sira ne’ebé besik. Sei hasa’e mós kapasidade país rua ne’e nian atu halo operasaun hamutuk bainhira presiza, halo ezersísiu no formasaun, nune’e mós halo kooperasaun iha asisténsia umanitária no iha ajuda ba dezastre sira.

Akordu ne’e mosu tuir sorumutuk ida entre Primeiru-Ministru australianu, Anthony Albanese ho Prezidente Repúblika timorense, José Ramos-Horta. Iha enkontru ida-ne’e, Xefe Estadu timoroan no Primeiru-Ministru australianu diskute kona-ba seguransa hamutuk, kooperasaun ekonómika, mobilidade no kompeténsia laborál, ekonomia verde no apoiu Austrália kona-ba kandidatura Timor-Leste nian hodi adere ba ASEAN.