Ministru Fidelis ohin fila mai Dili, hafoin halo vizita ofisiál sira ba Jakarta no Roma
Ministru Prezidénsia Konsellu Ministrus, Fidelis Manuel Leite Magalhães, ohin, loron 1 fulan-setembru tinan 2022, fila ona mai Dili, hafoin halo vizita ofisiál sira ba Jakarta, iha Indonézia no ba Roma, iha Itália.
Iha konferénsia imprensa, portavós Governu nian relata ba jornalista sira kona-ba rezultadu prinsipál sira husi vizita ba país rua ne’e.
Iha Roma, Ministru Fidelis lidera delegasaun governamentál, ne’ebé inklui mós Ministru Turizmu, Komérsiu no Indústria, José Lucas do Carmo da Silva, iha serimónia elevasaun Dom Virgílio do Carmo da Silva nian, nu’udar Kardeál timoroan dahuluk.
Ministru Fidelis hetan mós oportunidade hodi realiza sorumutuk badak ida ho Papa Francisco, hodi agradese no hato’o fila-fali konvite ba Papa atu vizita Timor-Leste.
Delegasaun governamentál ne’e hala’o sorumutuk ida, iha Roma, ho komunidade timoroan ne’ebé hela iha país oi-oin iha Europa hodi rona sira-nia preokupasaun sira.
Hala’o mós sorumutuk ho reprezentante sira husi organizasaun parseira sira hanesan WFP no FAO hodi ko’alia kona-ba prioridade Governu VIII nian atu hamenus malnutrisaun infantíl.
Governante ne’e halo mós sorumutuk ho Padre Jezuita timoroan, João Inocêncio da Piedade, ne’ebé hanorin filozofia iha Pontifícia Universidade Gregoriana, universidade Igreja Katólika nian iha Roma, hodi diskute kona-ba oinsá atu promove diskursu públiku intelektuál no sientífiku iha Timor-Leste.
Molok halo viajen ba Roma, hosi loron 18 to’o 24 fulan-agostu, Governante ne’e hala’o vizita ofisiál ida ba Jakarta.
Durante vizita ida-ne’e, Ministru Fidelis hala’o sorumutuk ho Ministru Koordenadór ba Asuntus Marítimus no Investimentu Repúblika Indonézia nian, Luhut Binsar Pandjaitan, ho diplomata sira ne’ebé akreditadu ba Timor-Leste ne’ebé hela iha Jakarta, parseiru dezenvolvimentu sira, emprezáriu no personalidade relevante sira seluk.
Realiza mós palestra sira iha universidade haat iha kapitál indonézia, iha ne’ebé realiza mós sorumutuk sira ho objetivu atu dezenvolve parseria ho instituisaun nasionál sira, hanesan INAP no universidade timoroan sira.
Ministru mós hetan entrevista hosi CCN Indonézia no Detikcom.
Vizita ofisiál ida-ne’e ho objetivu atu hametin relasaun bilaterál ho Indonézia no fó hatene iha estranjeiru kona-ba rezultadu prinsipál no progresu sira ne’ebé Timor-Leste alkansa ona.
