Timor-Leste simu vizita ofisiál husi Ministra Negósius Estranjeirus Austrália nian
Ministra Negósius Estranjeirus Austrália nian, Senadora Penny Wong, hala’o ona, hosi loron 31 fulan-agostu to’o loron 1 fulan-setembru, vizita ofisiál ida ba Timor-Leste, hodi hametin lasu bilaterál sira entre país rua ne’e. 
Durante ninia vizita, Ministra australiana ne’e hala’o sorumutuk sira ho Prezidente Repúblika, José Ramos-Horta, Primeiru-Ministru, Taur Matan Ruak, Ministru Finansas, Rui Augusto Gomes no ho ninia omóloga timoroan, Ministra Adaljiza Magno.
Ministra Wong ninia vizita ofisiál dahuluk ba Timor-Leste ne’e ho objetivu hanesan impulsu atu reforsa relasaun bilaterál sira entre Timor-Leste ho Austrália.
Ministra Negósius Estranjeirus australiana ne’e hatudu ninia laran-ksolok ba biban hodi halo sorumutuk ho Xefe Estadu no Governu Timor-Leste nian no membru Governu sira no nia destaka katak “sira fahe ambisaun ne’ebé hanesan hodi halo Timor-Leste forte liu no prósperu liu liuhusi kooperasaun ida ne’ebé metin iha setór saúde, edukasaun, dezenvolvimentu suku sira, infraestruturas, konetividade no área sira seluk.” Durante sorumutuk sira, diskute ona mós kona-ba mobilidade laborál, área ida ne’ebé “lori benefísiu ba país rua ne’e”.
Governante ne’e mós reafirma disponibilidade Austrália nian hodi kontinua apoia kandidatura Timor-Leste nian ba ASEAN no ba Organizasaun Mundiál Komérsiu nian.
Primeiru-Ministru, Taur Matan Ruak afirma katak kooperasaun bilaterál entre Dili ho Kamberra durante tinan 20 ikus ne’e importante tebes no lori benefísiu barak ba Timor-Leste, liuliu iha tinan haat ikus ne’e, iha ne’ebé nivel kooperasaun nian aumenta, iha área oioin, hanesan defeza no seguransa, desentralizasaun, justisa, no iha área estratéjika sira hanesan projetu sira haluan Aeroporto Internacional Presidente Nicolau Lobato no instalasaun kabu fibra ótika nian. 
Xefe Governu ne’e destaka mós númeru vasina sira ne’ebé boot, millaun ida resin, ne’ebé haruka ba Timor-Leste durante luta kontra COVID-19 no apoiu iha resposta ba dezastre naturál sira.
Taur Matan Ruak aproveita biban ne’e, lori povu timoroan tomak nia naran, hodi agradese Ministra Penny Wong, Primeiru-Ministru Anthony Albanese no povu australianu ba apoiu tomak no kooperasaun ne’ebé fó ona ba Timor-Leste.
