Governu Timor-Leste

Elevasaun Dom Virgílio do Carmo da Silva, ba Kardeál ba dahuluk iha Timor-Leste, hala’o iha loron 27 fulan-agostu tinan 2022, iha serimónia ida iha Bazílika São Pedro, Vatikanu, ne’ebé sura ho prezensa husi delegasaun governamentál ida, ne’ebé lidera husi Ministru Prezidénsia Konsellu Ministrus, Fidelis Manuel Leite Magalhães no komposta mós husi Ministru Turizmu, Komérsiu no Indústria, José Lucas do Carmo da Silva.

Saserdote Salezianu, Dom Virgílio do Carmo da Silva, dirije Igreja Dili nian hahú husi tinan 2016 no iha idade 54, sai hanesan membru ida ne’ebé joven liu iha Koléjiu Kardeál sira nian, órgaun konsultivu ida husi Papa, ne’ebé nia funsaun atu ajuda Papa iha governasaun Igreja Katólika nian.

D. Virgílio hala’o ninia aspirantadu, pré-Semináriu, iha Fatumaka iha tinan 1983. Nia tama iha novisiadu mós iha Fatumaka, iha tinan 1989-1990. Hahú hala’o ninia profisaun ba dahuluk iha loron 31 fulan-maiu tinan 1990. Hala’o ninia estudu filozófiku sira no kursu Teolojia iha Filipinas, iha Canlubang no Parañaque. Halo ninia profisaun perpétua iha loron 19 fulan-marsu tinan 1997. Simu ordenasaun saserdotál iha Parañaque, Filipinas, iha loron 18 fulan-dezembru tinan 1998. Hafoin ne’e, nia kolokadu iha uma saleziana Venilale nian nu’udar ekónomu no vigáriu. Iha tinan 2005, haruka nia ba Roma hodi hasai kursu Teolojia Espirituál iha Universidade Pontifícia Salesiana. Fila mai Timor-Leste, nomeadu hanesan mestre ba novisu no diretór ba Uma Fatumaka, kargu ne’ebé nia ezerse iha tinan 2008 to’o fulan-janeiru tinan 2014, iha tinan ne’ebé nia asume kargu hanesan Superiór Provinsiál.

Kardeál foun ne’e, hafoin anúnsiu ba desizaun, iha loron 29 fulan-maiu liubá, nia afirma katak, nia iha “konviksaun katak Papa Francisco lakohi atu fó púrpura ida-ne’e ba [Dom Virgílio] rasik, maibé ba Igreja no povu Timor-Leste” no nia hatutan katak, “Povu no Igreja Timor-Leste merese hetan grasa no rekoñesimentu ida-ne’e husi Maromak, ba país ida iha ne’ebé Evanjellu to’o mai tinan 500 liubá no selebra ninia aniversáriu independénsia nian ba da-20 iha loron 20 fulan-maiu”.

Primeiru-Ministru, Taur Matan Ruak, iha ninia mensajen felisitasaun ba Dom Virgílio do Carmo da Silva, hateten katak, “ho desizaun Papa Francisco nian ne’ebé matenek no hateke ba dook, nia sai timoroan dahuluk ne’ebé hetan fiar atu hala’o kna’ar sira ne’ebé importante liu iha Igreja Katólika nia laran hodi reprezenta Timor-Leste iha Koléjiu Kardinalísiu” no Ministru Fidelis mós fó parabéns ba kardeál foun “ba distinsaun onroza ida-ne’e, ne’ebé nu’udar orgullu boot ida ba povu timoroan tomak no nu’udar rekoñesimentu ida tuir méritu ba ninia servisu no ninia kualidade umana”. 

Molok serimónia kriasaun ba kardeál foun sira, Ministru Magalhães, ne’ebé akompaña husi delegasaun Governamentál timoroan, hetan oportunidade hodi halo vizita kortezia badak ho Papa Francisco, hafoin agradese ba nomeasaun ida-ne’e no konvida Papa atu vizita Timor-Leste. Hafoin serimónia ne’e, delegasaun, partisipa iha han-kalan konfraternizasaun nian ida, ne’ebé oferese husi Kardeál Dom Virgílio do Carmo da Silva. Han-kalan ne’e hetan mós partisipasaun husi komunidade timoroan iha Itália, Reinu Unidu, Portugál, Irlanda no iha país europeu sira seluk. Durante estadia delegasaun Governu Timor-Leste nian iha Roma, membru Governu sira hala’o ona sorumutuk sira ho Diretora Ezekutiva Adjunta ba Programa Alimentár Mundiál (WFP), Valerie Guarnieri, ho Diretór-Jerál husi Organizasaun Nasoins Unidas nian ba Alimentasaun no Agrikultura (FAO), Qu Dongyu no ho eis-Xefe Programa Alimentár Mundiál nian (WFP) iha Timor-Leste, Dagend Liu.

Hala’o mós sorumutuk ho Profesór Doutór Padre João Inocêncio da Piedade, Padre Jezuita timoroan no profesór filozofia iha Pontifícia Universidade Gregoriana, universidade Igreja Katólika nian iha Roma no ho komunidade timoroan iha Itália.

Molok vizita ba Roma, hosi loron 18 to’o loron 24 fulan-agostu tinan 2022, Ministru Prezidénsia Konsellu Ministrus, Fidelis Magalhães, hala’o vizita ofisiál ida ba Jakarta, iha Indonézia, iha ne’ebé hala’o sorumutuk ofisiál, palestra no entrevista sira ba meius komunikasaun lokál sira.