Delegasaun governamentál ne’ebé lidera husi Ministru Fidelis Magalhães partisipa iha serimónia elevasaun Dom Virgílio do Carmo da Silva hanesan Kardeál
Ministru Prezidénsia Konsellu Ministrus, Fidelis Manuel Leite Magalhães, sei lidera delegasaun governamentál, ne’ebé komposta husi Ministru Turizmu, Komérsiu no Indústria, José Lucas do Carmo da Silva, sei reprezenta Governu Konstitusionál VIII, iha Vatikanu, iha loron 27 fulan-agostu, iha serimónia kriasaun ba kardeál foun hamutuk 21, ne’ebé sei inklui Kardeál timoroan dahuluk, Dom Virgílio do Carmo da Silva.
Papa Francisco fó-sai ona iha loron 29 fulan-maiu liubá, naran kardeál foun na’in-21 ne’ebé sei kria iha Konsistóriu, sorumutuk husi kardeál sira ne’e maka fó apoiu ba Amu-Papa iha ninia desizaun sira.
Hafoin fó-sai desizaun ida-ne’e, Porta-Voz Governu Konstitusionál VIII nian fó parabéns ba Dom Virgílio do Carmo da Silva no mós reprezentante Vatikanu nian iha Timor-Leste, Monseñór Marco Sprizzi, “ba distinsaun onroza tebes ida-ne’e, ne’ebé nu’udar orgullu boot ida ba povu timoroan tomak no nu’udar rekoñesimentu ida tuir méritu ba ninia servisu no ninia kualidade umana”.
Primeiru-Ministru, Taur Matan Ruak, iha ninia mensajen felisitasaun nian ba Dom Virgílio do Carmo da Silva, hateten katak “ho desizaun Papa Francisco nian ne’ebé matenek no hateke ba dook, nia sai timoroan dahuluk ne’ebé bolu atu hala’o kna’ar sira ne’ebé importante liu iha Igreja Katólika nia laran hodi reprezenta Timor-Leste iha Koléjiu Kardinalísiu”.
Ida-ne’e sei sai hanesan konsistóriu daualuk husi pontifikadu atuál, hafoin hala’o iha loron 22 fulan-fevereiru tinan 2014, loron 14 fulan-fevereiru tinan 2015, loron 19 fulan-novembru tinan 2016, loron 28 fulan-juñu tinan 2018, loron 5 fulan-outubru tinan 2019 no loron 28 fulan-novembru tinan 2020.
