Governu Timor-Leste

Primeiru-Ministru, Taur Matan Ruak, iha segunda-feira, loron 8 fulan-agostu tinan 2022, simu família husi militár na’in-lima Repúblika Koreia nian ne’ebé integra iha Misaun Pás ONU nian ne’ebé mate iha asidente ida iha mota Noel Ekab, iha Oesilu, Oekusi, iha loron 23 fulan-outubru tinan 2003.

Majór Bayunjo, Sarjentu Jonghoon Baek, Majór Jinkyu Park, Sarjentu Jeongjoong Kim no Sarjentu Hee Choi, ne’ebé hola parte ba batallaun súl-koreanu ROKBATT VII no mate tanba korrente bee ne’ebé makaas bainhira hakur mota Noel Ekab , iha zona Bobometo nian.

Durante hasoru-malu ho família sira, Xefe Governu realsa katak “militár koreanu na'in-lima mós nu'udar asua’in Timor-Leste nian, tanba sira partisipa iha misaun ida ne’ebé importante ba Timor, ne’e-duni sira halo parte iha istória Timor nian no povu tomak sei nunka haluha sira-nia dedikasaun no sakrifísiu ”.

“Lori ha'u-nia naran no lori Governu no Estadu Timor-Leste nia naran, ha'u hato'o hakuak boot ba família ida-idak no agradese tebes ba família sira no ba nasaun Koreia tanba Ita-boot sira fó ona Ita-boot sira-nia oan ne'ebé maka sakrifika sira-nia-an no kontribui ona atu harii ami-nia nasaun”, dehan Primeiru-Ministru.

Na’i-ulun ne’e hatutan tan katak “rai ida-ne'e mós Ita-boot sira-nian no Ita-boot sira mós nu'udar ami-nia família”.

Taur Matan Ruak hato'o mós  agradesimentu ba Embaixadór Koreia nian iha Timor-Leste, Kim Jeong Ho no ba eis-Komandante batallaun koreanu nian Kim Yeong Deok,  iha momentu asidente ne’e nian.

Embaixadór Kim Jeong Ho mós agradese ba Primeiru-Ministru ba nia disponibilidade hodi simu família no ba liafuan murak sira ne'ebé hato’o ba sira.

Iha loron 5 liubá, hala'o serimónia omenajen no inaugurasaun ba monumentu ida, iha Oébau, Oekusi, ne'ebé organiza husi Prezidente Autoridade Rejiaun Administrativa Espesiál Oekusi Ambenu (RAEOA), Arsénio Bano, ne'ebé marka mós prezensa husi família vítima sira, Embaixadór Koreia Súl no husi eis-Komandante Batallaun nian.

Iha ohin dadeer, Prezidente Repúblika, José Ramos-Horta, fó ba militár Koreia-du-Súl na'in-lima ne’e, ho títulu póstumu, Medalla Méritu nian, iha serimónia ida ne'ebé konta ho partisipasaun husi Primeiru-Ministru no membru Governu sira. Medalla Méritu ne'e ho intensaun atu rekoñese no agradese ba sivíl no militár sira, nasionál no internasionál sira, ne'ebé fó ona kontribuisaun ida ne’ebé signifikativu ba pás no estabilidade nasionál.