Governu Timor-Leste

Primeiru-Ministru, Taur Matan Ruak, iha loron 27 fulan-jullu tinan 2022, iha Palásiu Governu, lidera reuniaun daruak Komisaun Interministeriál nian ba koordenasaun kadeia valór no estimula produsaun lokál.

Reuniaun ne’e ho objetivu atu diskute no halo pontu situasaun ba progresu sira ne’ebé alkansa ona husi serbisu tékniku komité ne’ebé apoia komisaun ida ne’e. Analiza mós dezafiu no obstákulu sira ne’ebé hasoru iha melloria mekanizmu sira, atubele aselera implementasaun programa ida-ne’e nian.

Komisaun interministeriál ne’e, harii ona iha fulan-maiu liubá, ho misaun atu aprezenta ba Konsellu Ministrus kona-ba rekomendasaun sira ne’ebé ho objetivu ba melloria no koerénsia polítika públika, sistema no prosedimentu administrativu, kuadru jurídiku, koordenasaun kadeia valór no Estimula kreximentu produsaun nasionál nian, hodi bele konkretiza meta no objetivu sira ne’ebé prevee ona iha Planu Estratéjiku ba Dezenvolvimentu no Programa Governu nian.

Komisaun interministeriál ne’e, prezide husi Primeiru-Ministru no mós komposta husi Ministru Koordenadór ba Asuntu Ekonómiku, Ministru Turizmu, Komérsiu no Indústria, Ministru Agrikultura no Peska, Ministru Finansas, Ministru Obras Públikas.

Komisaun ne’e, iha komité apoiu nian ida ne’ebé koordena husi Xefe Gabinete Primeiru-Ministru no kompostu husi Diretór-Jerál sira ministériu nian ne’ebé envolve iha komisaun ne’e, komisáriu Autoridade Aduaneira, Autoridade Tributária no reprezentante mikro empreza sira, empreza sira ho dimensaun ki’ik, empreza sira ho dimensaun média, empreza sira ho dimensaun boot no husi Instituisaun bankária sira.