Governu Timor-Leste

Primeiru Ministru Taur Matan Ruak, akompaña ho membru sira VIII Governu Konstitusionál nian, partisipa ona iha loron 14 fulan-jullu tinan 2022, iha debate estadu nasaun nian ho Parlamentu Nasionál. Ne’e debate estadu nasaun dahuluk husi Lejislatura ida-ne’e.

Durante debate ne’e Primeiru-Ministru no membru Governu sira hatán ba kestaun no preokupasaun sira husi membru sira Parlamentu Nasionál nian no aprezenta ona kontribuisaun sira ne’ebé relevante liu VIII Governu Konstitusionál nian ba dezenvolvimentu polítiku, ekonómiku no sosiál, nune’e mós prioridade, planu no dezafiu sira pasadu no futuru nian.

Xefe Governu, iha ninia intervensaun iha abertura debate nian, halo deskrisaun rezultadu prinsipál nian sira iha mandatu.  Rezultadu sira ne’e agrupa iha área temátika Planu Estratéjiku ba Dezenvolvimentu (PED) nian, ne’ebé organiza iha área tolu ne’ebé importante tebetebes, maka hanesan Kapitál Sosiál, Dezenvolvimentu Infraestrutura no Dezenvolvimentu Ekonómiku, no mós  envolve área/setór dahaat, Dezenvolvimentu Institusionál, ne’ebé transversal ho sira seluk.

Primeiru-Ministru subliña ona “katak karik laiha envolvimentu no kooperasaun institusionál hosi órgaun sira hotu, setór sosiedade no parseiru dezenvolvimentu sira nian, Governu ne’e rasik sei la konsege alkansa rezultadu sira ne’ebé aprezenta ona”.

Xefe Governu hato’o  mós ninia “satisfasaun no orgullu ne’ebé boot ba sentimentu realizasaun nian, iha balansu ida-ne’e (…) iha ukun durante tinan haat”, ne’ebé nia konsidera “pozitivu tebtebes hodi buka nafatin rezultadu ne’ebé exelente, maske hetan difikuldade sira ne’ebé ita labele sees, ne’ebé ita-nia país ne’e hasoru durante mandatu ne’e”.