Serimónia Entrega Instrumentu Ratifikasaun Akordu Kona-ba Mobilidade CPLP nian
Ohin, loron 17 fulan-juñu tinan 2022, Timor-Leste, liuhusi Ministra Negósius Estranjeirus no Kooperasaun, Adaljiza Magno, entrega ba Sekretariadu Ezekutivu CPLP nian, Instrumentu Ratifikasaun Akordu Kona-ba Mobilidade entre Estadu-Membru sira CPLP nian.
Adaljiza Magno ne’ebé simu husi Sekretáriu Ezekutivu CPLP nian, Zacarias da Costa, klasifika ona momentu ne’e “espesiál tebes” iha serimónia ida ne’ebé konta mós ho prezensa hosi Reprezentante Permanente sira Estadus-Membru CPLP nian.
Akordu ne’e, asina ona iha loron 17 fulan-jullu tinan 2021, iha Luanda, “hanesan prioridade ida ba Governu Timor-Leste, tanba permite hodi disolve obstákulu sira ba sirkulasaun povu Komunidade País Lian Portugés nian”, afirma Ministra.
Timor-Leste sei hetan benefísiu husi implementasaun akordu ida-ne’e nian, tanba sei kria oportunidade iha área oioin, hanesan turizmu, saúde, edukasaun, desportu, siénsia no área ekonómika emprezariál no sei kontribui ba dezenvolvimentu no hadi’a kualidade moris ha’u-nia rain.
Ministra Negósius Estranjeirus timoroan ne’e termina ninia intervensaun, hodi hateten katak “ho Komunidade País Lian Portugés nian, hamutuk no hametin abut hosi ita-nia lian, kultura no istória, ita hein katak hamutuk ita bele alkansa objetivu sira CPLP nian.
Sekretáriu Ezekutivu CPLP ne’e hateten katak “kuaze país sira hotu ratifika ona” akordu ida-ne’e. Hela de’it nasaun Giné Ekuatoriál ne’ebé termina hela ninia prosesu internu no Angola maka termina ona prosesu ne’e, hein de’it markasaun ba loron serimónia entrega nian.
