Atleta 38 despede husi Primeiru-Ministru hodi partisipa SEA Games 2022 iha Vietnám
Loron kinta-feira, 5 fulan-maiu tinan 2022 – Atleta Timor-oan nain 38 akompaña husi Sekretáriu Estadu Juventude no Desportu (SEJD), Abrão Nokosiku Saldanha, Confederação Desportiva de Timor-Leste (CDTL) no Comitê Olímpico Nacional de Timor-Leste (CONTL) halo despedida ho Primeiru-Ministru (PM), Taur Matan Ruak iha salaun Presidência do Conselho de Ministros (PCM), Palásiu Governu, Dili hodi partisipa eventu Sea Games 2022 iha Vietnám.
PM, Taur Matan Ruak hatete “tempu to’o ona atu kompete iha oportunidade ida ne’e, signifika treinu no investimentu, ho kualidade no importante lo’os, tanba halo selesaun ba mellores entre atletas hotu, ba sira ne’ebé di’ak liu”, atu bele kompete no reprezenta Timor-Leste iha Sea Games Vietnám 2022 ne’e.
“Tanba ne’e ha’u fiar imi bele reprezenta Timor-Leste no ami nia orasaun ho matebian sira akompaña no tulun imi nafatin durante viajen no mós jogu sira to’o imi filafali hó isin di’ak, tenke disiplina no rona treinadór sira, hakarak imi ho nasaun nia susesu, fó liman ba imi, konfia imi, tanba ne’e ha’u fo parabéns ba imi”, haktuir PM.
Xefe Ezekutivu ne’e reforsa tán katak importante liu mak lori bandeira Timor-Leste iha ne’ebá, “tanba ita ukun-an ona ne’e, ita nia prezensa iha jogu internasionál sira ne’e importante tebes ba Timor-Leste no mundu, boa sorte ba imi hotu”.
Sekretáriu Estadu SEJD, Abrão Nokosiku, lori joven no pratikante desportu no atletas hotu nia naran, hato’o agradesimentu ba Primeiru-Ministru nia disponibilidade hodi bele fó despedida ba atleta sira, liuliu husik hela sira nia kontizenti Timor-Leste nian atu partisipa iha jogus sudeste aziátiku iha tinan ida ne’e iha Vietnám.
Governante SEJD relata ba PM katak, “tinan ida ne’e Timor-Leste nia partisipasaun hamutuk atleta tolunulu-resin-ualu (38), kompostu husi modalidade atletizmu, Tae-Kwondo, Boxin, Natasun, Karatedo, Alteferizmu ka Hi’it Besi no Futeból”.
“Atleta sira daudauk ne’e iha rua nulu-resin-lima (25) ne’ebé maka iha ona Vietnám, liu-liu modalidade Futeból, tanba sira halo preparasaun iha Malázia no rai sira seluk, no agora dadaun 13 mak hamutuk ho ofisiál sira hanesan treinadór foin mak aranka ba Vietnám”.
“Maski iha duni difikuldades balu atu prepara sira sai husi ita nia rai, liuliu tinan kotuk enfrenta pandemia Covid-19, tanba ne’e iha tinan ida ne’e ita esforsu ho CDTL no federasaun sira hamutuk ho CONTL konsege lori sai atleta ba tuir eventu Sea Games 2022 iha Vietnám no ida ne’e fó orgulu ba Timor oan sira iha eventu rejionál ida ne’e”, reforsa Abrão Nokosiku.
“Tinan hirak ne’e setór desportivu avalia no husu ba federasaun sira la’ós de'it atu partisipa, ho neneik maibé ita tenke hatudu ona ispíritu kompete nian. Hanesan Estadu ida hakarak hatudu nia kapasidade atu kompete. Tanba ne’e mak atleta sira ne’ebé agora atu sai daudau ne’e maioria mai husi faze selesaun husi kampionatus nasionais ho liga nasionais mak foin selesionadu iha rai laran, hafoin prepara atu ba kompete, nune’e bele kompete ho dignidade no hatudu ita hotu nia orgullu”.
Eventu ida ne’e hanesan kompetisaun rejionál, tanba ne’e importante tebes ba nasaun soberanu ida atu hatudu konvivénsia iha rejiaun, liuliu iha sudeste aziátiku, tanba sei iha mós jogus internasionais balun hanesan ASEAN GAMES ne’ebé sei halo mós iha tinan ida ne’e. “Hafoin partisipa iha eventu ida ne’e, ita sei haree atletas mellores atu bele kontinua nafatin iha jogus ida ass liu tan mak ASEAN GAMES”.
Partisipa mós iha sorumutu despedida ne’e, Xefe Gabinete PM, Xefe Gabinete SEJD, Diretór-Jerál Servisu Koorporativu SEJD, Diretora Alta Kompetisaun no Prestasaun SEJD, Prezidente CDTL, Vise-Prezidente CONTL no mós ofisiál sira husi kontijente Timor-Leste ba Sea Games Vietnám 2022 nian.
